Banda­ríkja­menn gera loft­á­rásir á Íran

Trump greindi frá þessu í færslu á samfélagsmiðlinum sínum skömmu fyrir miðnætti á íslenskum tíma. Þar segir hann Bandaríkin hafa varpað sprengjum á Fordó, Natanz og Esfahan. Allar flugvélarnar sem notaðar voru til árásanna séu komnar út fyrir íranska lofthelgi. 

„Fullum farmi af SPRENGJUM var varpað á aðalstöðina, Fordó. Allar flugvélarnar eru heilar og á leiðinni heim. Hamingjuóskir til hinna miklu bandarísku stríðsmanna okkar. Það er enginn annar her í heimi sem gæti gert þetta. NÚ ER KOMINN TÍMI Á FRIÐ! Ég þakka þeim sem hlýddu,“ skrifar Bandaríkjaforseti.

Blaðamaður fréttaveitunnar Reuters hefur eftir heimildarmanni sínum í bandaríska hernum að B-2 Spirit-sprengjuflugvélum hafi verið beitt við árásirnar. Óljóst er hve margar voru notaðar við árásirnar en Bandaríkin búa yfir nítján slíkum vélum en þær eru þær einu sem eru útbúnar til að geta varpað sprengjum af gerðinni GBU-57 eða svokölluðum byrgjabrestum.

Orð Trumps í færslunni um að tími sé kominn á frið gefa til kynna að hann hafi ekki áhuga á frekari árásum á Íran. Það gæti þó breyst, svari Íranar fyrir sig með eldflauga- og drónaárásum á bandarískar herstöðvar í Mið-Austurlöndum. Ráðamenn í Íran höfðu hótað slíkum árásum, ef Bandaríkjamenn gerðu árásir á Íran.

Donald Trump Bandaríkjaforseti mun ávarpa þjóð sína klukkan tvö í nótt að íslenskum tíma. Í tilkynningu sinni þess efnis segir hann árásina marka sögulega stund fyrir Bandaríkin, Ísrael og heiminn allan og segir að Íranir hljóti að gangast við því að ljúka þessu stríði að svo komnu máli.

New York Times hefur eftir þremur nafnlausum írönskum embættismönnum að árásirnar á Fordó og Natanz hafi verið gerðar um klukkan ellefu að íslenskum tíma.

Fréttin hefur verið uppfærð.