Steypu­mót féll á starfs­mann byggingar­fyrir­tækis

Í dagbók lögreglunnar á höfuðborgarsvæðinu er greint frá þessu, en fram kemur að málið sé í rannsókn. Slysið varð á varðsvæði lögreglustöðvar fjögur, sem nær yfir Grafarvog, Mosfellsbæ og Árbæ. Annað vinnuslys varð í Laugardal í gær.

Frá klukkan fimm í gær til klukkan fimm í nótt voru sextíu mál skráð í kerfum lögreglunnar á höfuðborgarsvæðinu, færri en alla jafna aðfaranætur helgardaga. 

Á varðsvæði fjögur var einstaklingur handtekinn grunaður um líkamsárás. Árásaðilinn hafði flúið af vettvangi að lokinni árás. Málið er samkvæmt dagbókinni í rannsókn.

Í miðbæ Reykjavíkur var einstaklingur handtekinn þar sem hann hafði ítrekað verið til vandræða. Mat lögreglu var að aðilinn þyrfti að gista í fangageymslu þangað til viðkomandi væri í ástandi til að vera úti meðal almennings.

Á öllum varðsvæðum hafði lögregla afskipti af ökumönnum vegna umferðarlagabrota. Lögreglumenn á lögreglustöð þrjú, sem nær yfir Kópavog og Breiðholt, stöðvuðu ökumann í akstri sem var grunaður um akstur undir áhrifum vímuefna. Við afskipti lögreglu reyndi ökumaður að ljúga til nafns og þá kom einnig í ljós að hann var sviptur ökuréttindum. Sá var laus eftir sýnatöku.