Sport

Vita ekki fyrr en í lok mánaðar hvort þeir fái að vera með í Evrópudeildinni

Hjörtur Leó Guðjónsson skrifar
Stuðningsmenn Crystal Palace fögnuðu sigrinum í FA-bikarnum vel og innilega. Þrátt fyrir það gæti liðið misst af sæti í Evrópudeildinni.
Stuðningsmenn Crystal Palace fögnuðu sigrinum í FA-bikarnum vel og innilega. Þrátt fyrir það gæti liðið misst af sæti í Evrópudeildinni. Visionhaus/Getty Images

Leikmenn, þjálfarar og stuðningsmenn Crystal Palace þurfa að öllum líkindum að bíða þar til í lok júnímánaðar til að fá að vita hvort liðið fái að taka þátt í Evrópudeildinni á næsta tímabili.

Crystal Palace vann sér inn sæti í Evrópudeildinni þegar liðið vann Manchester City í úrslitum FA-bikarsins, en sigur í keppninni gefur þátttökurétt í þessari næststærstu Evrópukeppni.

Hins vegar er óvíst hvort liðið fái að taka þátt í Evrópudeildinni. Ástæðan er sú að Eagle Football, sem á stóran hlut í Crystal Palace, á einnig meirihluta í franska liðinu Lyon.

Lyon á sæti í Evrópudeildinni á næsta tímabili, en tvö lið undir sama eignarhaldi mega ekki taka þátt í sömu Evrópukeppninni samkvæmt reglum UEFA.

Forráðamenn Crystal Palace ferðuðust til Sviss í vikunni sem nú er að líða og hafa verið að funda með talsmönnum UEFA. Ef marka má heimildarmenn BBC gæti niðurstaða fengist í málið í næstu viku, en það gæti þó dregist fram í lok júnímánaðar.

Forráðamenn, leikmenn, stuðningsmenn og þjálfarar Crystal Palace bíða því eflaust með öndina í hálsinum þar til ákvörðun hefur verið tekin.

Mest lesið


Fleiri fréttir

Sjá meira


×

Mest lesið