Ís­lensk stúlka í út­skriftar­veislu sem breyttist í mar­tröð

Kristín Ella Guðmundsdóttir er búsett í smábænum Uhland í Texas ásamt eiginmanni sínum og þremur börnum. Þau fluttu út vegna vinnu eiginmannsins Guðmundar fyrir ári og helgin átti að vera tilefni til fögnuðar. Krakkar á átjánda aldursári útskrifuðust frá San Marcus high school á laugardaginn og haldin garðveisla þeim til heiðurs um kvöldið.

Umfjöllun KVUE um ódæðið og hinn látna má sjá í spilaranum.

Sautján ára dóttur Kristínar Ellu var boðið. Kristín Ella og Guðmundur skutluðu dótturinni og vinkonu í fögnuðinn og heilsuðu foreldrum Andrews Farias sem héldu veisluna í garðinum heima hjá sér.

„Ekki grunaði mig að fjórum tímum síðar myndu þau ásamt yngri börnum sínum horfa upp á útskriftarbarnið sitt myrt fyrir framan sig á nákvæmlega sama stað og ég var að heilsa þeim. Því miður var sú raunin í þetta skiptið. Allt vegna þess að einu barni, datt í hug að mæta með byssu.“

Bakpokar og byssur bannaðar

Kristín Ella segir í samtali við Vísi að partýið hafi átt að standa frá tíu um kvöldið og til eitt um nóttina. Ýmislegt er ólíkt því sem þekkist úr garðveislum hér heima. Meðal annars var bannað að mæta með bakpoka í partýið og sérstaklega tekið fram að byssur væru ekki leyfðar.

„Við hringdum í dóttur okkar þegar klukkan var orðin eitt til að athuga hvort að systir vinkonu hennar væri ekki komin að sækja þær eins og til stóð. Á meðan símtalið átti sér stað heyrðum við byssuhvellina og allt fór í rugl í partýinu.“

Kristín Ella útskýrir að strákur og stelpa, gestir í veislunni, hafi byrjað að rífast og ekki látið orðaskipti nægja heldur farið að slást.

Reyndi að stilla til friðar

„Útskriftardrengurinn kemur að og ákveður að ganga á milli þeirra, en þá er hinn drengurinn búin að taka upp byssu og byrjar að skjóta. Hann hittir í nokkra krakka, þar á meðal stelpuna sem hann er að rífast við en annað skot fer beint í höfuðið á útskriftardrengnum sem hefur líklega látið lífið samstundis. Foreldrar hans sátu og horfðu upp á hann deyja fyrir framan nefið á sér án þess að hafa tækifæri til að geta aðhafst neitt.“

Veislan leystist upp þar sem gestirnir flýðu í allar áttir undan piltinum vopnuðum byssu.

„Dóttir mín og vinkona hennar þurftu að hlaupa í burtu og fela sig í næstu görðum og eyddu þar næsta klukkutímanum með okkur foreldrana á línunni þangað til hægt var að komast að þeim og sækja þær. Lögguþyrlur, sjúkrabílar og löggubílar voru út um allt en einnig hlaupandi krakkar í myrkrinu að fela sig þar sem drengurinn með byssuna flúði af vettvangi. Hann er enn ófundinn,“ segir Kristín Ella.

Veislan hafi verið á litlum sveitabæ þar sem eru engin götuljós og myrkrið því mikið. Því hafi lögreglan haft litla yfirsýn yfir hverjir voru í veislunni. Rannsókn málsins virðist ganga hægt og ekki rætt við krakkana sem voru í partýinu til að afla upplýsinga. Þá hefur engum gestanna verið boðin áfallahjálp.

„Sem er svo sem skiljanlegt. Það er erfitt að halda utan um svona stóran atburð á litlum stað eins og Uhland er. En það er minningarstund á morgun, sem fótboltaliðið hans er að halda að mér skilst,“ segir Kristín Ella en Andrew spilaði fyrir ameríska fótboltalið skólans sem syrgir leikmann sinn.

Enginn hefur enn verið handtekinn vegna árásarinnar mannskæðu.

„Af hverju er heimurinn okkar orðinn svona. Ég geri mér fulla grein fyrir því að ég er í Ameríku og þar er aðgengi að byssum auðvelt. En þetta er ekki bara í USA. Vopnaburður og ofbeldi hefur snaraukist síðustu ár alls staðar í heiminum, líka á Íslandi, og erum við að lesa fréttir um mannskæðar árásir hér og þar. Hvernig gerist svona?

Hvað verður til þess að ungt fólk og jafnvel börn ákveða að fara vopnuð út úr húsi? Við hvað eru þau hrædd? Hverju þurfa þau að verjast? Hvað er að ógna þeim?“ spyr Kristín Ella.

Hún segir byssueign mjög algenga í Texas og hafa komið þeim mjög á óvart til að byrja með að sjá fólk með byssur á sér í matvöruverslunum. Það hafi þó vanist hratt. Börnin þeirra þrjú á táningsaldri hafi nokkrum sinnum lent í svokölluðu „lock down“ í skólanum vegna hættuástands. Í þeim tilfellum hafi hættu verið afstýrt skjótt eða raunveruleg hætta hafi ekki verið til staðar.

Hún er mjög hugsi yfir vopnaburði barna, af öllum toga, og segir mikilvægt að laga og snúa ástandinu við á meðan það sé enn möguleiki.

„Þetta er vandamál samfélagsins okkar, okkar foreldranna. Við þurfum að laga þetta saman. Við eigum að geta leyft börnunum okkar að hittast og hafa gaman, án þess að það hafi varanlegar afleiðingar, eða jafnvel endi líf þeirra, eins og við höfum nokkur dæmi um.“

Móðir syrgir son sinn

Andrew Farias var átján ára gamall og nýútskrifaður úr San Marcus High School. Hann spilaði fótbolta og ætlaði að mennta sig frekar í University of Texas í haust. Shannon Vasquez, móðir hans, minnist sonar síns.

„Litli strákurinn minn lýsti upp hvert herbergi. Hann var stórkostlegur stóri og litli bróðir. Hann elskaði systkini sín og sjúpföður. Hann var þekktur fyrir stóra fallega brosið sit. Orð fá ekki lýst þeim sársauka sem ég finn. Ég hef misst minn besta vin. Ég elska öll börnin mín en Andrew átti sérstakt pláss í hjarta mér.“

Byssulöggjöfin í Texas er mjög frjálsleg. Fullorðnir mega bera skotvopn opinberlega án sérstaks leyfis, bæði haglabyssur og skammbyssur, svo lengi sem þeir eru ekki með dóm fyrir ákveðin afbrot. Lögin urðu enn frjálsari árið 2021 þegar fólk þurfti ekki lengur sérstakt „license to carry“ leyfi til að bera byssu. Byssur eru þó bannaðar á ákveðnum viðburðum og í ákveðnum byggingum svo sem skólum. Þá mega verslanir og fyrirtæki neita fólki um að bera vopn í sínum húsakynnum.