Gómuðu fíkni­efna­sala sem flúði á hlaupahjóli

Þetta er meðal þess sem fram kemur í dagbók lögreglunnar á höfuðborgarsvæðinu um verkefni hennar frá 17 í gær til klukkan 5 í morgun.

Lögreglunni barst tilkynning um mann sem neitaði að yfirgefa húsnæði þar sem hann var óvelkomin. Maðurinn hafi verið mjög ölvaður, sýnt af sér ógnandi hegðun og ekki verið í ástandi til að vera meðal almennings. Hann hafi ekki hlýtt neinum fyrirmælum um að yfirgefa húsið og á endanum verið handtekinn og vistaður í fangaklefa.

Bílvelta og hávaðaseggur í Kópavogi

Þá barst lögreglunni tilkynning um bílveltu þar sem bíl hafði verið ekið fram af grasbarði og hann endað á hliðinni. Reyndist ökumaðurinn vera með minniháttar áverka og var hann fluttur á slysadeild.

Í Kópavogi barst einnig tilkynning um mann með mikil læti og í annarlegu ástandi í fjölbýlishúsi. Hann hafi verið með mikinn fyrirgang í íbúð, á stigangi og við húsið svo ekki var svefnfriður í húsinu. Maðurinn var handtekinn og vistaður í fangaklefa „þar til það rennur af honum víman,“ segir í dagbók lögreglunnar.

Stútar, hraðakstur og nagladekk

Í umdæmi lögreglustöðvar 1 sem nær yfir Miðborgina, Vesturbæ, Austurbæ og Nesið voru þrír ökumenn stöðvaðir vegna gruns um akstur undir áhrifum vímuefna. Tveir þeirra reyndust án ökuréttinda.

Lögreglan á Vínlandsleið stöðvaði ökumann sem mældist á 105 km/klst þar sem hámarkshraðinn er 50 km/klst. Ökumaðurinn var sviptur ökuréttindum og á von á sekt. Þá sektaði lögreglan einnig tvo ökumenn fyrir að vera á nagladekkjum.