„Gæti vel verið en það er bara fókus á næsta leik“

Daði skoraði líka í síðasta leik og er því kominn með tvö mörk og eina stoðsendingu í fyrstu þremur deildarleikjunum eftir að hafa farið til Vestra á láni frá Víkingi rétt fyrir tímabilið.

„Mér líður gríðarlega vel, þetta er búið að vera ógeðslega gaman. Alvöru challenge að fara vestur og spila fótbolta fimm klukkutímum frá bænum. Aðeins út úr þægindarammanum. En mér líður bara frábærlega, geggjað lið og geggjað þjálfarateymi, verður ekki betra.“

Miðað við formið sem hann er í og meiðslavandræði Víkinga hlýtur Sölvi Geir Ottesen að sakna Daða svolítið.

„Það gæti vel verið en það er bara fókus á næsta leik, ég er bara leikmaður Vestra í dag og það er bara fullur fókus á næsta leik.“

Daði getur líka vel við unað hjá Vestra, liðið er taplaust og hefur haft hann í stóru hlutverki í fyrstu þremur leikjunum. Framundan er heimaleikur gegn Breiðablik, næsta sunnudag.

„Davíð er búinn að segja við okkur, við getum gert það sem við viljum. Við erum með hausinn rétt skrúfaðan á og getum gert hvað sem er, byrjum á Blikum heima á sunnudaginn.“

Skrítinn skóbúnaður

Daði var að lokum spurður út í skóbúnaðinn, hann var í sitt hvorum skónum. Líka með gat á báðum hælum, sem honum þykir víst þægilegra.

„Takkinn fór sko af hægri skónum í hálfleik, þannig að ég þurfti að skipta yfir í preddanna í hálfleik. En það skiptir ekki máli, við vinnum, þá er ég sáttur“ sagði Daði að lokum.