Fimm­tugur geð­læknir ók bílnum

Læknirinn ók BMW um fjögur hundruð metra í gegnum jólamarkaðinn á miklum hraða og á fjölda fólks. Tveir eru látnir og þar á meðal eitt ungabarn en rúmlega sextíu eru særðir og þar af að minnsta kosti fimmtán alvarlega.

Sjá einnig: Heyrðu í þyrlum og öskrum út um gluggann

Heimildarmaður Reuters í Sádi-Arabíu segir að yfirvöld þar hafi varað yfirvöld í Þýskalandi við lækninum, sem sagður er heita Taleb Abdul Jawad, eftir að hann ku hafa deilt öfgafullum skoðunum á X (Twitter). Þá hefur fréttaveitan eftir þýska miðlinum Spiegel að Jawad hafi aðhyllst stjórnmálaflokkinn AfD, eða Valkost fyrir Þýskaland.

Það er fjarhægri flokkur en leiðtogar hans hafa verið sakaðir um miklar öfgar á undanförnum mánuðum og stendur meðal annars gegn fjölgun innflytjenda í Þýskalandi.

Jawad er talinn hafa verið einn að verki en hann hefur búið og unnið í Þýskalandi frá árinu 2006. Í grein Berliner Zeitung segir að á samfélagsmiðlum hans megi sjá að hann styðji AfD og að honum virðist verulega illa við íslam en á sama tíma hefur hann lýst yfir mikilli andstöðu við það hvernig komið er fram við flóttafólk frá Mið-Austurlöndum í Þýskalandi.

Spigel segir greiningu á færslum mannsins á samfélagsmiðlum sýna fram á aðdáun á bandaríska samsæringnum Alex Jones, breska öfgamanninum Tommy Robinson og auðjöfrinum Elon Musk. Hann hefur meðal annars sagt að allt sem þeir hafi sagt um íslamsvæðingu Vesturlanda sé rétt.

Átta ár eru frá því maður frá Túnis ók sendiferðabíl gegnum jólamarkað í Berlín en þá dóu tólf manns.