Nú þegar hafa Repúblikanar tryggt sér meirihluta í öldungadeild Bandaríkjaþings. Þeir hafa náð 53 sætum gegn 45 hjá Demókrötum en hverjir sitja í tveimur sætum er óljóst, enn sem komið er.
Nái Repúblikanar meirihluta í fulltrúadeildinni eru þeim allir vegir opnir næstu tvö árin, takist leiðtogum þingflokksins að halda aga meðal þingmanna, en á hinn bóginn gjóa Demókratar vonaraugum til fulltrúadeildarinnar. Þeir vonast eftir því að ná meirihluta og þannig geta haldið aftur af Donald Trump í Hvíta húsinu.
Repúblikanar í aðeins betri stöðu
Repúblikanar voru fyrir kosningarnar með fjögurra sæta meirihluta í fulltrúadeildinni og hefur síðasta kjörtímabil einkennst af gífurlegri óreglu í fulltrúadeildinni. Hópur verulega íhaldssamra þingmanna Repúblikanaflokksins, hefur leikið Mike Johnson, tiltölulega óreyndar forseta þingsins, mjög grátt á köflum.
Sjá einnig: Fengu aðstoð Demókrata við að koma hernaðaraðstoð úr nefnd
Samkvæmt AP fréttaveitunni er mögulegt að meirihluti næsta kjörtímabils, sama hvoru megin hann verður, verði mjög smár. Þá er ekki víst að ljóst verði hver flokkurinn verði með meirihluta fyrr en í næstu viku.
Það er vegna þess að mörg kjördæmanna þar sem atkvæði eru ótalin eru í Kaliforníu en þar geta utankjörfundaratkvæði borist í pósti langt eftir kjördag. Einnig þykir staðan mjög jöfn í nokkrum kjördæmum í Omaha, Nebraska og Alaska.
Þegar þetta er skrifað er „staðan“ í fulltrúadeildinni 210 – 198 Repúblikönum í vil. Til að mynda meirihluta þarf 218 sæti en einungis 27 sæti eru laus, ef svo má segja.
Staðan þykir aðeins betri fyrir Repúblikana sökum þess að af þessum 27 lausu sætum þurfa Demókratar að vinna fimmtán en Repúblikanar bara átta, til að ná meirihluta.
Vilja „koma böndum“ á alríkið.
Mike Johnson segist nokkuð borubrattur um að Repúblikanar nái meirihluta í fulltrúadeildinni og þar með fullu húsi, ef svo má segja. Með stjórn á báðum deildum þings og Hvíta húsinu segir Johnson að Repúblikanar ætli sér stóra hluti.
Hann segir hundrað daga áætlun í vinnslu og að Donald Trump sé að hugsa mikið um arfleifð sína.
Meðal þess sem er efst á lista Repúblikana er að fara í skattalækkanir, grípa til aðgerða á landamærum Bandaríkjanna og Mexíkó og fella niður fjölda reglugerða á alríkissviðinu. Þeir vilja einnig flytja alríkisstofnanir úr Washington DC, reka fjölda opinberra starfsmanna og ráða inn nýja með því markmiði að „koma böndum“ á alríkið, eins og Johnson hefur orðað það.
Þá hefur Trump sjálfur heitið því að vísa miklum fjölda innflytjenda sem eru ólöglega í Bandaríkjunum úr landi og refsa meintum óvinum sínum.
