Afmæliskaka hinnar sönnu raunveruleikastjörnu?

Í nýlegri færslu Kylie Jenner, þegar hún fagnaði eins árs afmæli fatafyrirtækis síns KHY, birti hún mynd af  hvítri köku með svörtum slaufum. 

Ástrós birti mynd af sambærilegri köku á dögunum þegar hún fagnaði 30 ára afmæli sínu. 

Sambærileg áhugamál

Báðar eiga það sameignlegt að vera miklar ofurskvísur, áhrifavaldar og tískuunnendur. 

Kylie er, eins og frægt er, ein af Kardashian-systrunum heimsþekktu sem slegið hafa í gegn í samnefndum raunveruleikaþáttum. Kylie stofnaði snyrtivörumerkið Kylie Cosmetics þegar hún var aðeins sautján ára gömul. Síðan þá hefur hún látið til sín taka í viðskiptalífinu og er hún í dag metin á 750 milljónir Bandaríkjadollara.

Þó svo að Ástrós sé ekki með fylgjendahóp af sömu stærðargráðu og Kylie, er hún einn þekktasti áhrifavaldur hér á landi. Ástrós er hvað þekktust fyrir hlutverk sitt í raunveruleikaþáttunum LXS og sem dansari í sjónvarpsþáttunum Allir geta dansað sem báðir voru sýndir á Stöð 2. 

Nýverið gaf hún út fatalínuna Ástrós x Andrea, í samtarfi við fatahönnuðinn Andreu Magnúsdóttur.

Sjá: Heitustu skvísur landsins skáluðu fyrir Ást­rós

Bakað fyrir stórstjörnur

Eva María Hallgrímsdóttir, eigandi kökugallerísins Sætra synda, segir hvítar kökur með svörtum slaufum afar vinsælar um þessar mundir. 

„Þetta er alveg trendið núna. Við erum á fullu að gera svona kökur, enda sjúklega flottar. Þetta er svona smjörkrems vintage-þema sem er mjög inn núna, það er svolítið síðan við byrjuðum, öruglega um átta mánuðir, þetta fór svo að verða vinsælla og vinsælla. Ég held að við höfum verið fyrstar með þetta hér á landi,“ segir Eva í samtali við Vísi. 

Spurð hvort hún telji líklegt að Kylie hafi fengið hugmyndina af kökunni frá þeim segir Eva það ekki útilokað. Fyrirtækið hafi þjónustað fjöldann allan af þekktum Hollywood-stjörnum í gegnum árin.

„Við höfum gert kökur fyrir fullt af þekktum aðilum. Við gerðum Elmo-köku fyrir tveggja ára afmæli Daisy, dóttur tónlistarkonunnar Katy Perry, fyrir hljómsveitina Guns and Roses sem þeir buðu upp á fyrir tónleikana sín og fyrir afmælisveislu förðunarfræðingsins Huda Beauty sem hún fagnaði í Blá lóninu, svo dæmi séu nefnd.“