Sendillinn sendi dóttur Lilju tvö skilaboð. Í þeim fyrri byrjaði sendillinn á því að segja verði þér að góðu og svo í öðrum skilaboðum að hún væri „fallegasta stelpa sem hann hefði séð á Íslandi“.
Lilja segir ástæðu yfirvofandi tilkynninga til lögreglu og Persónuverndar þá að sendillinn hafi misnotað upplýsingar sem þær hafi látið Wolt fá fyrir sendinguna en einnig hafi hann verið að áreita dóttur hennar.
Ekki eina tilvikið
Lilja birti færslu í hópnum Mæðratips á mánudag. Þar birti hún skjáskot af skilaboðunum og spurði aðrar konur í hópnum hvort þær hefðu lent í einhverju svipuðu. Viðbrögðin hafa ekki staðið á sér.
„Þetta er orðið aðeins of mikið. Ég hef fengið skilaboð frá konum sem kommentuðu ekki undir færsluna. Menn eru að koma og halda því svo áfram. Fara svo að hringja og hætta því ekki. Þetta eru menn sem eru að koma með mat heim til hans,“ segir Lilja í samtali við fréttastofu.
Sama dag og hún setti inn færsluna fékk hún símtal frá starfsmanni Wolt sem hafði verið bent á hana. Sjálf segist hún hafa leitað og leitað að númeri til að hringja í til að tilkynna málið en ekkert fundið á heimasíðunni.
„Honum fannst þetta alvarlegt og sagði að þessi maður fengi áminningu en var á sama tíma dálítið kjánalegur,“ segir Lilja.
Hún segir það sláandi hversu margar konur tóku undir færsluna hennar og lýstu því að hafa lent í svipuðum aðstæðum.
„Þær voru að segja frá og taka undir,“ segir Lilja og að í sögunum hafi líka verið að fjalla um leigubílstjóra sem hagi sér með óviðeigandi hætti.
Þora ekki að panta lengur frá Wolt
Í athugasemdunum má sjá að fjölmargar konurnar hvetja hana til að tilkynna til lögreglunnar og aðrar sem hvetja hana, og aðra, til að hætta að nota Wolt.
„Ég hef lent í þessu 2x og þori ekki lengur að panta þaðan því miður 😬 en hef þá tilkynnt í gegnumappið og því verið tekið alvarlega,“ segir ein í athugasemd.
„Já ég fór út í innkeyrslu að sækjaaf því þeir funduu ekki hurðina og fékk svona athugasemd, tveir menn saman og ég ein að kvöldi til. Ekkert eðlilega óþægilegt enda aldrei pantað þaðan aftur,“ segir önnur.
Þá segir ein frá því að sendill frá Wolt hafi fylgst með henni fyrir utan heimili hennar.
„Oj ég lenti í því að einhver ógeðslega creepyy gaur frá woltt var allt í einu mættur inn í íbúð til mín 😳 hebtwtw aldrei pantað þaðan. Þurfti á endanum að fylgja honum að réttri íbúð þannig að hann færi loksins. Ég þurfti að skjótast stuttu seinna að sækja manninn minn, þá beið hann í bílnum sínum fyrir utan íbúðina að fylgjast með mér.“
Uppfært 24.10.2024 klukkan 17:46
Í svari til fréttastofu vegna málsins sagði Christian Kamhaug, fjölmiðlafulltrúi Wolt, að þeim hafi verið tilkynnt um áreitni af hálfu sendla af viðskiptavinum. Þau harmi það og taki það mjög alvarlega. Þá biðli þau til viðskiptavina að tilkynna slíka hegðun til fyrirtækisins í gegnum Support á heimasíðu fyrirtækisins. Þannig getu þau safnað saman upplýsingum um málið.
Christian segir fyrirtækið ekki þola áreitni af neinu tagi og að þau leggi áherslu á gott samstarf við viðskiptavini þegar slík mál koma upp. Þau slíti samningum við sendla sem hagi sér með óviðeigandi hætti um leið.
„Sem fyrirtæki tökum við slíkum tilkynningum alvarlega og sem stelpufaðir get ég líka tengt við þetta á persónulegum nótum. Þetta er ekki eins og við viljum að fólk upplifi fyrirtækið,“ segir Christian.
Þá segir hann fyrirtækið vinna með yfirvöldum í hverju landi fyrir sig komi til þess.
