Stjórnar­flokkarnir ekki enn komnir með for­gangs­lista mála

Samkvæmt starfsáætlun Alþingis átti að fresta fundum þess að loknu vorþingi hinn 7. júní. Vegna aðdraganda forsetakosninga var þing framlengt til 14. júní eða til síðast liðins föstudags. Birgir Ármannsson forseti Alþingis sagði í samtali við fréttastofuna á miðvikudag að 25 þingmál væru það langt komin í afgreiðslu þingsins að auðvelt ætti að vera að klára þau. Hins vegar liggja um 80 stjórnarmál óafgreidd fyrir þinginu.

Logi Einarsson þingflokksformaður Samfylkingarinnar segir stjórnarandstöðuna ekki hafa verið upplýsta um hvaða mál stjórnarflokkarnir setji í forgang.

„Við byrjuðum að kalla eftir samtali stjórnarandstaðan fyrir mánuði. Við hittumst tvisvar en þá var allt óljóst frá hendi stjórnarinnar. Þau ætluðu svo að hafa samband við okkur þegar þau væru tilbúin sín meginn. Það hefur ekkert gerst, það hefur ekkert heyrst og mér sýnist hnúturinn bara vera að herðast í mörgum málum. Meðan þau eru algerlega ósamstíga,” segir Logi.

Stjórnarandstaðan viti því ekki hver forgangur stjórnarflokkanna er. Eitt af þeim málum sem stjórnarflokkarnir hafa margsinnis frestað er samgönguáætlun 2024 til 2038 sem margir bíða eftir. Það var síðan ákveðið af meirihluta umhverfis- og samgöngunefndar að fresta henni fram á haustþing.

„Við höfum ekki fengið neinn lista frá þingflokksformönnum stjórnarliða um hvaða mál þau ætli að klára og hvaða mál þau ætla ekki að klára. Það er alveg ljóst að þau munu ekki ná að klára allt og þau verða að fara að koma með forgangslista,” segir þingflokksformaður Samfylkingarinnar.

Þingfundur hefst klukkan þrettán þrjátíu í dag og fyrir honum liggja þrjátíu og eitt stjórnarmál. Logi segir mörg mál ætla að reynast stjórnarflokkunum erfið svo sem eins og frumvarp matvælaráðherra um lagareldi og umhverfis- og orkumálaráðherra um vindorku.

„Svo vekur það náttúrlega athygli að það er komið fram yfir venjulegt þinghald og við erum ekki búin að klára fjármálaáætlun. Hún verður auðvitað að klárast hefði ég haldið,“ segir Logi Einarsson.

Allar líkur væru á að stjórnarliðar væru enn að takast á um hvað ætti að fara í fjármálaáætlunina. Það reynist erfitt að ná sambandi við þingflokksformenn stjórnarflokkanna en ef til vill skýrist línur eitthvað á fundi þingflokksformanna með forseta Alþingis sem hófst rétt fyrir hádegi.

Ingibjörg Ísaksen þingflokksformaður Framsóknarflokksins vonar að hægt verði að funda með þingflokksformönnum stjórnarandstöðuflokkanna seinnipartinn í dag. Þar verði farið yfir þau mál sem stjórnarflokkarnir leggi áherslu á að klára á vorþingi.