Arnar Þór ýjar að stofnun nýs stjórn­mála­flokks

Arnar hóf pistilinn á því að þakka öllum þeim sem sýndu honum stuðning í nýafstöðnum kosningum og óskaði Höllu Tómasdóttur til hamingju með sigurinn. „Í dag hef ég hvílst og fengið fjölmörg símtöl og hvatningarorð sem ég tek með mér inn í framtíðina, hver svo sem sú framtíð verður. Ég treysti því að verða leiddur til þess staðar sem mér er ætlaður,“ skrifar Arnar.

Hann segir að líkja megi reynslu síðustu mánaða við einhvers konar gegnumlýsingu. Samfélagið og samferðamennirnir sjáist í nýju ljósi, maður sjái hvað sé heilt og hvað ekki. Í sama ljósi sjái maður hvað er heilt í innra lífi manns sjálfs og hvað þurfi að styrkja.

Arnar fer svo með dæmisögu um þræla sem fá að kjósa, en bara frambjóðendur sem þrælahaldarinn sjálfur hefur valið. Einn þrællinn sér í gegnum blekkinguna, og varar fólk við því að kjósa frambjóðendurna sem eru í boði, því þeir haldi fólkinu bara áfram í ánauð. Sá er stimplaður óvinur lýðræðisins. Arnar segir að mögulegar hliðstæður megi finna úr stjórnkerfi Íslands. Dæmisagan er eftirfarandi:

Til að afstýra uppreisn meðal þrælanna ákveður þrælahaldarinn að boða til kosninga, þar sem þrælarnir fá að kjósa milli frambjóðenda sem hann hefur sjálfur valið. Frambjóðandi A lofar styttri vinnudegi, frambjóðandi B lofar skárri hádegismat. Með þessu er uppreisninni afstýrt og þrælarnir halda áfram að vinna, því þeir ímynda sér að þeir hafi stjórn á aðstæðum sínum. Einn þrællinn, Samúel, neitar að sætta sig við aðstæður. Hann stendur upp og varar aðra við því að kjósa A eða B, því þeir geri ekki annað en að sjá til þess að fólkið sé áfram í ánauð, því hvorugur frambjóðandinn hafi neitt fram að færa sem muni leysa þau úr fjötrum. En máttur blekkingarinnar er svo sterkur að þrælarnir, sem ímynda sér að þau hafi raunverulegt val, stimpla Samúel sem hættulegan mann og hann er húðstrýktur til bana fyrir að vilja skaða lýðræðið.

Að lokum horfir Arnar yfir hið pólitíska landslag hérlendis, og varpar fram nokkrum spurningum:

• Búum við við heilbrigt lýðræði?
• Breytir miklu í reynd hvort við kjósum flokka/frambjóðendur til hægri eða vinstri?
• Vex sérfræðingaveldið/báknið/tækniræðið stöðugt, án tillits til niðurstaðna kosninga?
• Hver er útgönguleiðin?
• Ný hugmyndafræði?
• Stofnun nýs stjórnmálaflokks?

Arnar Þór Jónsson var í forsetaframboði í ár og hlaut 5,1 prósent atkvæða. Áður var hann starfandi lögmaður og varaþingmaður Sjálfstæðisflokkins, frá árinu 2021. Þar áður var hann dómari við Héraðsdóm Reykjavíkur, en þegar hann lét af þeim störfum sagði hann að sér hefði liðið eins og fugli í búri í dómaraembættinu. Umhverfið hafi þrengt að hugsun hans, en eftir að hann kúplaði sig þaðan út hafi honum liðið eins og frjálsum manni með sjálfstæða rödd.