Strætó kveður Hlemm í bili

Þetta kemur fram í fréttatilkynningu frá Strætó. Þar segir að alls fjórtán leiðir muni hætta að aka um Hlemmtorg og muni í staðinn aka breyttar leiðir. Gerðar verði nýjar stöðvar við Snorrabraut og Borgartún og stöð við Þjóðskjalasafnið færð.

Þá verða nýjar tímabundnar endastöðvar.

• Leiðir 1, 4, 16, 17 og 18 verða með tímabundna endastöð við Skúlagötu sem verður ný endastöð.
• Leið 3 mun vera með endastöð við Granda en sú endastöð er þegar til, leið 14 hefur nú þegar endastöð þar.
• Leiðir 2 og 6 verða með tímabundna endastöð við Háskóla Íslands sem er ný endastöð.

Fram kemur að næturstrætó muni aka eins og venjulega næstu helgi og byrja breyttan akstur helgina á eftir, 7. – 9. júní. Eina biðstöðin sem detti út á þeim leiðum er biðstöðin Hlemmur.

Strætó hvetur farþega til að skoða upplýsingasíðu Strætó þar sem leiðir geta tekið breytingum á framkvæmdatíma en síðan er uppfærð jafnóðum. Þar er hægt að kynna sér breytingarnar og sjá kort af öllum leiðum.