Málið sé af­greitt og þar við sitji

Samkeppniseftirlitið, Alþýðusamband Íslands, neytendasamtökin og félag atvinnurekenda, eru allt félagasamtök og stofnanir sem hafa stigið fram og gagnrýnt þá málsmeðferð sem viðhöfð var þegar umdeildar breytingar voru gerðar á búvörulögum og afurðastöðvum - ekki aðeins í eigu bænda - var veitt undanþága frá samkeppnislögum. 

Á dögunum sendu sérfræðingar matvælaráðuneytisins atvinnuveganefnd bréf þar sem alvarlegar athugasemdir voru gerðar við málsmeðferð og það gagnrýnt að þeir hafi ekki verið kallaðir til fundar. Þá hafi breytingar í meðförum nefndarinnar gengið mun lengra en upphaflega hafi verið lagt upp með í upprunalegu frumvarpi. 

Bjarkey Olsen Gunnarsdóttir, nýr matvælaráðherra sat í nefndinni og kom að umræddum breytingum en fréttastofa náði tali af henni þegar hún hafði nýlokið sínum fyrsta ríkisstjórnarfundi.

Er þetta ekki óheppileg staða fyrir þig?

„Nei nei, ég tel svo ekki vera og ég meina það er ekkert óeðlilegt að ráðuneytið gefi til kynna ef það hefur efasemdir eða áhyggjur af einhverju og nú er málið bara afgreitt af hálfu þingsins og þetta bréf er þá bara statt þar, og það er svo sem ekkert meira um það að segja,“ segir Bjarkey.

Hún var spurð hvort það væri ekki eitthvað í lögunum sem þyrfti að endurskoða í ljósi þeirrar hörðu gagnrýni sem hafi komið fram.

„Ja, það var leitað álits Alþingis og starfsfólks þess á því hvort þetta væri hæf málsmeðferð og niðurstaðan var sú að svo væri. Ég er ekki lögfræðingur, ég get ekki sagt neitt meira um málið að svo stöddu.“

Svo ég skilji þig alveg rétt, það verður ekkert gert, lögin eru komin og þar við situr?

„Ráðuneytið allavega hyggst ekki grípa inn í að svo stöddu.“

Láta vinna fyrir sig greinargerð um næstu skref 

Neytendasamtökin og Félag atvinnurekenda ásamt fleiri samtökum íhuga nú að höfða mál vegna málsmeðferðar atvinnuveganefndar og segja að málið hafi ekki hlotið þrjár umræður fyrir Alþingi líkt og stjórnarskrá kveður á um því breytingarnar sem nefndin hafi gert séu hafi verið svo róttækar. Undir það tekur stjórnsýslufræðingur sem fréttastofa hefur rætt við. Bjarkey var spurð hvernig henni litist á mögulega málshöfðun.

„Ja, það verður bara allt að hafa sinn gang og ekkert nýtt undir sólinni að slíkt sé gert.“