Viðskipti innlent

Leiðin­legt með loðnuna en svona er þetta bara

Kristján Már Unnarsson skrifar
Guðmundur Óskarsson fiskifræðingur er sviðsstjóri uppsjávarsviðs Hafrannsóknastofnunar.
Guðmundur Óskarsson fiskifræðingur er sviðsstjóri uppsjávarsviðs Hafrannsóknastofnunar. Einar Árnason

Væntingar um tugmilljarða loðnuvertíð eru fyrir bí. Loðnubrestur virðist staðreynd.

Í fréttum Stöðvar 2 var fjallað um loðnuna en í venjulegu árferði væri íslenski loðnuflotinn þessa dagana að ljúka loðnuvertíð. Loðna í nægilegu magni til að réttlæta veiðar hefur hins vegar ekki ennþá fundist.

-Er hægt að segja núna að það sé loðnubrestur þennan veturinn?

„Já, ég held við getum sagt það með mjög mikilli vissu að það verður ekki loðnuvertíð þennan veturinn,“ svarar fiskifræðingurinn Guðmundur Óskarsson, sviðstjóri uppsjávarsviðs á Hafrannsóknastofnun.

Vopnafjörður er meðal þeirra samfélaga sem eiga mikið undir loðnuveiðum. Þar rekur Brim uppsjávarvinnslu.Stöð 2

Hann segir allmikla leit hafa verið gerða að loðnunni í vetur en telur að það sé í rauninni bara minna af henni en gert hafi verið ráð fyrir í haust.

Síðasta loðnuleitarleiðangri, þeim þriðja frá áramótum, lauk án árangurs í febrúarlok. Ábendingar um loðnugöngur síðan hafa að mati fiskifræðinga ekki þótt nægilega afgerandi til að bregðast við.

„Það er komin loðna fyrir utan Breiðafjörð að hrygna, bara í litlu magni. En það er allavega hrygning að eiga sér stað,“ segir Guðmundur.

Loðnu landað um borð í Beiti NK, skip Síldarvinnslunnar. Myndin er tekin í norðanverðum Faxaflóa fyrir þremur árum.Sigurjón Ólason

Loðnuvertíðin í fyrra var óvenju góð, gaf milli 50 og 60 milljarða króna útflutningsverðmæti. Fáir bjuggust við öðru eins ævintýri í ár. Engu að síður voru væntingar um kannski 20 milljarða króna vertíð. Þetta er því skellur.

„Já, örugglega. Því að við gerðum ráð fyrir að það gæti orðið einhver vertíð, þó að hún yrði aldrei mikil. Kannski milli 100 og 200 þúsund tonna vertíð. En það gengur ekki eftir, það er alveg ljóst.

Þetta er bara leiðinlegt. En svona er þetta. Við erum búin að fá núna þrjú ár með loðnu. Ágætisvertíðir tvær þarna. Þar á undan voru tvö loðnuleysisár.“

„Þetta er bara leiðinlegt. En svona er þetta,“ segir fiskifræðingurinn í viðtali við Stöð 2.Einar Árnason

Þegar spurt er um skýringar segir Guðmundur vitað að loðnan hafi upp úr aldamótum tekið að færa sig nær Grænlandi, sennilega vegna umhverfisbreytinga í hafinu.

„Síðan þá hafa vertíðirnar ekki verið eins stórar. Framleiðni stofnsins hefur ekki verið eins mikil. Af hverju vitum við ekki. En mögulega er það svæði bara ekki að gefa eins mikið,“ svarar fiskifræðingurinn.

Hér má sjá frétt Stöðvar 2:

Loðnuveiðar Sjávarútvegur Efnahagsmál Vopnafjörður Sveitarfélagið Hornafjörður Langanesbyggð Síldarvinnslan Brim Ísfélagið

Tengdar fréttir

Byggðirnar bíða spenntar fregna um hvort loðnuganga sé fundin

Vonir um loðnuvertíð þennan veturinn hafa glæðst eftir að fiskiskip urðu vör við flekki djúpt út af Suðausturlandi í gær, sem líklegt þykir að séu stórar loðnutorfur. Í loðnubyggðum landsins bíða menn spenntir fregna um hvort loðna sé fundin í nægilegu magni til að leyfa veiðar.

Tugmilljarða verðmæti í húfi og halda í vonina um loðnuvertíð

Ráðamenn sjávarútvegsfyrirtækja halda enn í vonina um loðnuvertíð í vetur þrátt fyrir að Hafrannsóknastofnun hafi tilkynnt í dag að enginn loðnukvóti verði gefinn út eftir nýafstaðna loðnuleit. Gríðarlegir hagsmunir eru í húfi fyrir þjóðarbúið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið