Upp­sagnir hjá Brimi á Vopna­firði

Samkvæmt heimildum Vísis snýst málið um að um 20 manns er sagt upp fastráðningu og boðnir lausasamningar í staðinn. Er það um 30% af starfsfólki uppsjávarvinnslu Brims á Vopnafirði.

Íbúafjöldi Vopnafjarðarhrepps var 633 manns 1. janúar síðastliðinn. Uppsjávarvinnslan á Vopnafirði er sérhæfð til vinnslu á loðnu, síld, kolmunna og makríl.

„Þetta er bara excel dæmi um rekstur án þess að tekið sé tillit til byggðarlaga eða starfsmanna. Þetta er áfall fyrir bæði byggðina og fólkið sem hefur unnið þarna af trúmennsku,“ segir Sverrir Mar Albertsson, framkvæmdastjóri Afls stéttarfélags, í samtali við Vísi um málið.

Varaformaður Afls verður með starfsmönnum Brims í dag og veitir þeim ráðgjöf.

Magnús Róbertsson, vinnslustjóri Brim á Vopnafirði, vildi ekki veita viðtal vegna málsins fyrr en búið væri að ræða við starfsfólk.