Kastast í kekki milli Carrag­her og kærastans

Fótboltaþátturinn UEFA Champions League Today á CBS hefur notið gríðarlegra vinsælda undanfarin ár vegna óbeislaðrar gleði sparkspekinga og góðrar kemistríu milli fjórmenninga þáttarins. Þættinum stýrir sjónvarpskonan Kate Abdo og henni til halds og trausts eru fyrrverandi fótboltamennirnir Thierry Henry, Jamie Carragher og Micah Richards. 

Í gegnum tíðina hafa klippur úr þættinum reglulega ratað á samfélagsmiðla vegna fíflagangs fjórmenninganna eða tryllingslegs hláturs Micah Richards sem gleður suma en pirrar aðra.

„Not to Malik?“

Þátturinn komst í fréttirnar fyrr í mánuðinum þegar Jamie Carragher sagði heldur óviðeigandi brandara um tryggð Kate Abdo við kærasta hennar, Malik Scott.

Jamie, sem er Liverpool-goðsögn, var kominn í Arsenal-treyju í tilefni af Meistaradeildareinvígi Arsenal og Porto. Hann sagði við Abdo að hún þyrfti á endanum að fara í treyjuna og svaraði hún „Ég er trygg.“ 

„Trygg hverjum?“ spurði Jamie og Abdo sem er frá Manchester-borg svaraði „Manchester United, takk fyrir.“

„Ekki Malik?“ spurði Jamie og hló tryllingslegum kreistum hlátri. Brandarinn vakti hins vegar afar litla hrifningu hinna þriggja og spurði Abdo hann „Hvernig geturðu sagt það?“

„Það hefur ekki enn verið minnst á hann í þættinum,“ sagði Carragher og umræðunni var í kjölfarið eytt.

Abdo gerði sjálf lítið úr atvikinu og grínuðust fjórmenningarnir með það í næsta þætti þegar hún líkti Carragher við pirrandi fjölskyldumeðlim. Hins vegar virtist ekki öllum skemmt yfir gríninu, sérstaklega ekki Malik.

Varaði Carragher við því að grínast með sambönd fólks

Malik Scott, sem er bandarískur boxari og hnefaleikaþjálfari Deontay Wilder, tjáði sig um málið í gegnum veðmálasíðuna Lord Ping þar sem hann varaði Carragher við því að vera með ósmekklegt grín um sambönd annarra.

„Ég er mjög ástfanginn af henni og ætla að giftast henni. Þetta sem gerðist með Jamie er hluti af starfinu en þetta er ekki í fyrsta skiptið sem hann segir eitthvað óviðeigandi. En þetta er í fyrsta skiptið sem hann segir eitthvað sem ýjar að röskun á heimilishaldi og sambandi pars,“ sagði Scott.

„Þetta var smávægilegur hlutur en að þetta hafi pirrað hana er eitthvað sem fór virkilega í mig. Að hann skuli segja þetta og sé alltaf að segja þessa stríðnis-brandara er ekki stórmál fyrir mér,“ sagði hann.

„Ef hún er ósátt er það stórmál fyrir mér og þá hringi ég í hann. Og ef hann svarar mér ekki þá mæti ég á staðinn svo við getum rætt málinn eins og karlmenn. Svo þetta er ekki eitthvað sem hann ætti að halda áfram að gera,“ sagði Malik.

Hins vegar hefði Carragher beðið Abdo afsökunar. Það væri ekki hægt að gera lítið úr því og sagðist Scott bera virðingu fyrir Carragher vegna þess. Netverjar telja hins vegar að Scott ætti frekar að beina orðum sínum að öðrum sparkspekingi.

Leyna viðbrögðin á sér?

Mikið hefur verið rætt og ritað um samskipti Abdo og Thierry Henry í þættinum og mikið gert úr hegðun Henry. Netverjar hafa sér til stuðnings tínt til augngotur kollegana, daðurslega hegðun þeirra og undarleg viðbrögð Henry við ýmsum yfirlýsingum Abdo.

Til að kanna betur þessar kenningar um hrifningu Henry þarf að spóla aðeins aftur í tímann eða til október 2023. Abdo sagði að von væri á stórri tilkynningu frá þættinum og spurði Carragher þá hvort Abdo væri að trúlofa sig. Hún játaði því en viðurkenndi að unnustinn vissi ekki af því. Greinilega var um grín að ræða.

Carragher og Richards hlógu að djókinu en Henry virtist ekki skemmt og varð hann óvenjualvarlegur þegar trúlofunin barst á góma.

Í febrúar á þessu ári rifjuðu fjórmenningarnir upp hvernig þau litu út árið sem Lamine Yamal, leikmaður Barcelona, fæddist en hann er fæddur 2007. Dregnar voru upp myndir af sparkspekingunum sem spiluðu allir enn fótbolta og myndskeið af Abdo þar sem hún var að stíga sín fyrstu skref í fréttamennsku.

Myndskeiðin vöktu mikla kátínu en Henry gapti af undrun yfir sextán árum yngri Abdo. Þótti einhverjum hann ekki ná að halda aftur af hrifningu sinni.

Snemma í marsmánuði á þessu ári greindi Abdo frá því að hún væri í sambandi með hnefaleikaþjálfaranum Malik Scott. Parið birti mynd af sér á Instagram af því tilefni þar sem Abdo sat í fangi Malik. 

Sambandið virðist þó þróast hratt af því það leið ekki vika frá tilkynningunni þar til Carragher spurði Abdo hvort þeim þremur yrði boðið í brúðkaup hennar. 

Abdo sagðist hafa verið að bíða eftir spurningunni en á meðan hallaði Henry sér aftur í stólnum eins og hann væri í losti. Abdo spurði Henry þá hvort hann vildi ekki fá boðskort.

„Ætlarðu að gifta þig Kate?“ spurði Micah Richards í kjölfarið.

„Malik vill giftast mér get ég sagt þér, geturðu álasað manninum fyrir það?“ sagði Abdo.

Hvað gerist næst í sögunni spyr maður sig. Heldur Carragher sig á mottunni og heldur Malik ró sinni? Er Henry bara að þykjast eða er hann skotinn í Abdo? Verður af brúðkaupinu og mæta þremenningarnir? Hvenær ganga netverjar of langt í krufningunni? Hafa þeir kannski þegar gengið of langt?