Áhyggjuraddir og spurningaflóð á hitafundi um Grinda­vík

Þetta sagði einn af fyrirtækjaeigendum í Grindavík á íbúafundi í Laugardalshöll með fulltrúum allra flokka í bæjarstjórn. Íbúi þessi rekur fyrirtæki í Grindavík og fannst ástæða til þess að brýna bæjarfulltrúa til góðra verka því viðkomandi sagðist hafa saknað bæjarstjórnarinnar á þessum hamfaratímum og fannst fulltrúar hennar þurfa að standa sig betur í að berjast fyrir hagsmunum fyrirtækjaeigenda í Grindavík.

Upp úr hádegi í dag dró til tíðinda þegar Lögreglustjórinn á Suðurnesjum ákvað að íbúar og starfsfólk Grindavíkur mættu frá og með morgundegi dvelja og starfa í bænum allan sólarhringinn. Í tilkynningu frá lögreglustjóranum sagðist hann hins vegar ekki mæla með því fyrir íbúa að gista í Grindavík og að bærinn væri ekki staður fyrir börn. Innviðir væru í lamasessi og hætturnar leyndust enn víða því sprungur geta opnast með litlum eða engum fyrirvara. Þau sem ætli sér að fara inn í bæinn geri það á eigin ábyrgð.

Hjálmar Hallgrímsson, formaður bæjarráðs Grindavíkurbæjar, sagði í viðtali í kvöldfréttum Stöðvar 2 að dagurinn í dag væri lyftistöng fyrir bæjarfélagið. „Að menn fái að athafna sig og huga að sínum eignum,“ sagði Hjálmar sem bætti við að enn þyki mögulegt að starfa í stórum hluta bæjarins.

Hann sjálfur hyggst þó ekki gista í Grindavík næstu nætur.

„Nei, ég ætla ekki að gista í Grindavík næstu nætur. Við erum svo sem ekki með kalt vatn en eflaust gera það einhverjir en það er enn svolítið að innviðum okkar, bæði heitt og kalt vatn. Eflaust ætla einhverjir að gista en ég ætla ekki að gera það,“ sagði Hjálmar.

Þrátt fyrir að nú sé aukið aðgengi að bænum þá mátti á fundinum víða sjá áhyggjufull andlit. Íbúar sögðu að þeir hefðu ekki þær forsendur sem þeir þyrftu að hafa til að byggja afdrifaríkar ákvarðanir um líf sitt á eins og hvort þeir ættu að selja heimili sín eða flytja fyrirtækin sín úr bænum og fannst vanta skýrari svör. Þá fannst mörgum sá frestur sem íbúar hafa til að taka umræddar ákvarðanir vera of naumur.

Nokkrir Grindvíkingar létu í ljós áhyggjur sínar af framtíð bæjarins og spurðu hvort hann myndi yfir höfuð lifa af ef mikill fjöldi bæjarbúa færði lögheimili yfir á önnur bæjarfélög. Mörgum var heitt í hamsi á fundinum og fjölmargar spurningar brunnu á íbúunum, sér í lagi í seinni hluta fundarins og ljóst er að mikil þörf var fyrir upplýsingafund fyrir íbúanna.