Innlent

Lagt til að Svan­hildur verði sendi­herra í Banda­ríkjunum

Kolbeinn Tumi Daðason skrifar
Svanhildur Hólm Valsdóttir er spennt fyrir nýju hlutverki.
Svanhildur Hólm Valsdóttir er spennt fyrir nýju hlutverki. Vísir/Vilhelm

Bjarni Benediktsson utanríkisráðherra hefur lagt til að Svanhildur Hólm Valsdóttir, framkvæmdastjóri Viðskiptaráðs, verði nýr sendiherra Íslands í Washington í Bandaríkjunum. Þetta staðfestir Svanhildur við fréttastofu. 

Bandaríkin eiga eftir að fallast á tillögu utanríkisráðherra um skipunina sem telja má líklegt að verði samþykkt. Hún segir um tímabundna skipun að ræða samkvæmt breytingu á lögum um utanríkisþjónustu sem var gerð árið 2020. Skipunin sé að hámarki til fimm ára og ekki með möguleika á framlengingu.

Með þeim fyrirvara að allt gangi upp segist Svanhildur spennt og upp með sér.

„Ég er náttúrulega mjög spennt fyrir þessu. Þetta er ótrúlegur heiður að fá að starfa fyrir Ísland. Þetta snýst um það að gæta hagsmuna Íslands erlendis. Leggja sitt af mörkum,“ segir Svanhildur.

Hún tekur við embættinu af Bergdísi Ellertsdóttur sem hefur gegnt því frá árinu 2019 þegar Geir Haarde, fyrrverandi fjármálaráðherra, lét af störfum. Löngum hefur verið talað um sendiráðsstöðuna í Bandaríkjunum sem eftirsóttasta starfið í utanríkisþjónustunni.

Svanhildur á vaktinni á verðlaunaafhendingu hjá Samtón árið 2019.Ásta Kristjánsdóttir

Hún leggur áherslu á að um þjónustustarf sé að ræða. Það felist í utanríkisþjónustu að aðstoða borgara landsins sem þurfi á liðveislu sendiráðsins að halda. Sömuleiðis að styðja við íslenskt atvinnulíf.

Þá sé það hlutverk sendiherra að styðja við íslenska menningu á erlendri grundu og efla menntasamstarf milli ríkjanna. Þá gegni sendiráðið mikilvægu hlutverki á sviði varnar- og öryggismála. 

Svanhildur ásamt eiginmanni sínum Loga Bergmann og góðum vinum á 200. sýningunni af Níu líf í Borgarleikhúsinu á dögunum.Owen Fiene

Svanhildur tekur til starfa í utanríkisráðuneytinu í vor og heldur svo vestur um haf í ágúst samþykki Bandaríkin tillögu Bjarna.

Skipun Bjarna á Svanhildi er eitt fyrsta verk hans í embætti utanríkisráðherra en hann tók við embættinu þegar þau Þórdís Kolbrún Reykfjörð Gylfadóttir höfðu stólaskipti um miðjan október. Svanhildur var í átta ár aðstoðarmaður Bjarna frá árinu 2012 til 2020.

Bjarni og Svanhildur á landsfundi Sjálfstæðisflokksins í fyrra.Vísir/Vilhelm

Svanhildur 

Svanhildur á að baki langan feril í fjölmiðlum þar sem hún starfaði bæði í Kastljósi á RÚV og Íslandi í dag á Stöð 2. Hún lauk lögfræðiprófi frá Háskóla Íslands árið 2009 og síðar MBA-prófi frá Háskólanum í Reykjavík.

Hún tók við sem framkvæmdastjóri þingflokks Sjálfstæðisflokksins árið 2009. Hún er gift Loga Bergmanni Eiðssyni fjölmiðlamanni sem starfar í dag hjá Samtökum fyrirtækja í sjávarútvegi.

Utanríkismál Sendiráð Íslands Sjálfstæðisflokkurinn Ríkisstjórn Katrínar Jakobsdóttur

Tengdar fréttir

Var orðin vön kvíðanum sem fylgdi

Undanfarin ár hefur fjölgað verulega í hópi fullorðinna sem greindir eru með ADHD og nú bíða á annað þúsund eftir þjónustu ADHD geðheilsuteymis heilsugæslunnar.

Kisurnar „sofa annað hvort ofan á mér eða límdar upp við mig“

Svanhildur Hólm Valsdóttir, framkvæmdastjóri Viðskiptaráðs Íslands, byrjar daginn á því að klappa kisunum sínum. Hún segir eiginmanninn sofa í gegnum fyrri hluta morgunrútínunnar en vakna við ófriðinn þegar hún fer að hafa sig til. Svanhildur segist mikil listakona í skipulagi og á það til að detta í einhver ofurgír á kvöldin.  

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið