Heims­­frægur krókódíla­sér­­­fræðingur nauðgaði, pyntaði og drap hunda

Adam Britton starfaði meðal annars fyrir BBC og National Geographic og fékk David Attenborough í heimsókn þegar náttúrulífssérfræðingurinn tók upp hlut þáttaraðarinnar Life in Cold Blood á landareign Britton.

Réttað var yfir Britton í Ástralíu en atriði málsins voru sögð svo hryllileg að dómarinn sá sér ekki annað fært en að vara alla viðstadda við og gefa þeim tækifæri til að yfirgefa réttarsalinn áður en málið var tekið fyrir. 

Undanþágan náði einnig til öryggisvarða og annarra starfsmanna dómstólsins.

Saksóknarar í málinu sögðu áhuga Britton á pyntingum og kynferðislegri misnotkun hunda ná aftur til að minnsta kosti 2014 en auk þess að beita eigin gæludýr ofbeldi falaðist hann eftir gæludýrum annarra til að misnota.

Hann fór meðal annars á netið og leitað að auglýsingum þar sem fólk var að láta gæludýr frá sér vegna flutninga eða vinnu. Þegar það hafði samband til að fá fréttir af líðan dýranna laug Britton að þeim og sendi þeim gamlar myndir.

Dýrin voru geymd í gámi á landareign Britton, sem hann kallaði „pyntingaklefa“. Þar hafði hann komið fyrir upptökubúnaði og deildi myndskeiðum af aðförum sínum á netinu. Eitt þeirra var sent lögreglu í fyrra.

Af þeim 42 hundum sem Britton pyntaði á átján mánuðum áður en hann var handtekinn drápust 39.

Britton verður gerð refsing í desember.