Þrjár utanlandsferðir á tólf dögum

„Við lítum á þetta sem vinnuferð þar sem við erum að kanna klúbbastemmninguna hérna úti og sjá hvernig við getum tekið giggin okkar á næsta level,“ segir Patrik og lýsir henni sem allt annarri en þekkist hérlendis.

„Það er allt öðruvísi stemning á klúbbunum hérna á miðað við heima. Fólk er ekki pissfullt að öskra í eyrun á hvort öðru, bara nóg pláss og allir að dansa.“

Missa ekki af giggi

Patrik fékk Gústa til liðs við sig í sumar til að sinna störfum sem plötusnúður á viðburðum. 

Aðspurðir hvernig samvinnan hafi gengið fara þeir fögrum orðum um hvern annan. „Held við séum báðir nokkuð slakir þrátt fyrir nokkra hnökra sem viðkoma ferðalögum,“ segir Gústi og hlær.

„Þú lést okkur hins vegar missa af fluginu okkar,“ skýtur Patrik inn í.

„Það var nú meira bara svona sameiginlegt klúður,“ segir Gústi blíðlega.

„Sameiginlegt klúður? Þú varst að borða pönnukökur þegar það stóð Gate Closing?“ bætir Patrik við.

Patrik og Gústi fóru í svokallaða pókerferð til Slóvakíu í byrjun mánaðar. Aðspurður hvort þeir hafi komið ríkari heim segjast þeir ekki verðleggja góðar minningar. „Við græddum þó ansi lítið fjárhagslega.“ 

Með þeim var hópur þjóðþekktra listamanna, Kristmund Axel, Herra hnetusmjör og leikarann Aron Má Ólason.

 „Við fórum fyrr heim úr þeirri ferð til að spila á Októberfest og árshátíð Play. Strax eftir giggin flugum við til Mallorca, aðeins að kanna svæðið með tilheyrandi skemmtun, Jetski og Parasailing,“ segir Gústi.

„Við erum að vinna með það að fara út á sunnudögum og mæta heim á fimmtudögum til að ná að gigga um helgar,“ bætir hann við.

Hótelsvíta og ný plata

Félagarnir er nú staddir á glæsihótelinu Ushuaia sem er aðeins fyrir fullorðna. Kærasta Patriks, Friðþóra, er með þeim í ferðinni og gista þau á svítu hótelsins sem kostar rúmar hundrað þúsund krónur nóttin samkvæmt vef Booking.com. 

Patrik skaust upp á stjörnuhimininn í byrjun árs þegar hann gaf út lagið, Prettyboitjokkó. Ný plata er nú væntanleg þar sem hann fékk einvalalið tónlistarmanna til liðs við sig.  

„Það er ekki ólíklegt að það verði nokkrir hittarar sem eigi eftir að slá í gegn,“ segir Patrik spenntur fyrir komandi tímum.