Innlent

Djúpadalsbóndi segir Teigsskóg snjóakistu

Kristján Már Unnarsson skrifar
Leifur Samúelsson, bóndi í Djúpadal í Gufudalssveit.
Leifur Samúelsson, bóndi í Djúpadal í Gufudalssveit. Egill Aðalsteinsson

Bóndinn sem býr næst Teigsskógi varar við miklum snjóþyngslum þar og mælist til að Hjallahálsi verði haldið sem vetrarvegi. Í Vesturbyggð óttast menn að þurfa að aka um Ódrjúgsháls í nokkur ár enn og krefst bæjarstjórinn þess að framkvæmdum verði ekki seinkað.

Bændur í Djúpadal voru heimsóttir í fréttum Stöðvar 2 en þeir eru meðal þeirra sem finna fyrir hvað mestum breytingum með vegarbótum um Gufudalssveit. Þeir eru þessa dagana að smala fé af fjalli.

„Það gekk bara vel að safna því saman. En við erum svo sem að draga saman í sauðfjárræktinni, nánast að hætta. Núna er það bara ferðamaðurinn sem tekur við,“ segir Leifur Samúelsson, bóndi í Djúpadal.

Horft inn Djúpafjörð frá Hallsteinsnesi. Hér mun Vestfjarðavegur liggja þar til búið verður að brúa Djúpafjörð og Gufufjörð. Vegurinn um Hjallaháls liggur um fjallið efst fyrir miðri myndEgill Aðalsteinsson

Með færslu Vestfjarðavegar hverfur Djúpidalur úr alfaraleið en þó ekki strax.

„Næstu 4-5 árin væntanlega verður keyrt áfram hérna inn eftir, framhjá okkur. En það er svo sem ágætt að losna við einn fjallveg.“

Já, þegar vegurinn um Teigsskóg opnast losna Djúpadalsbændur við Hjallaháls. Leifur segir hann svo sem ekki hafa verið vandamál fyrir þau. Hann sé þó skelfilegur núna enda hafi viðhaldi hans verið lítið sinnt miðað við umferð. Hann óttast þó að snjóþyngsli í Teigsskógi verði ekki minni en á Hjallahálsi.

Séð yfir Teigsskóg. Hér liggur vegurinn að mestu ofan við skóginn.Egill Aðalsteinsson

„Það eru staðir í Teigsskógi, ef það gerir alvöru vetur, þá verður ansi mikill snjór víða, sýnist mér,“ segir Leifur en segir samt fínt að losna við Hjallahálsinn.

„Og keyra láglendisveg, ég tala nú ekki um á slitlagi. Vera laus við drulluna og grjótið.

En það er líka ágætt að hafa Hjallaháls tilbúinn ef það gerir alvöru snjó og Teigsskógur verður ófær, að nota hann sem vetrarveg,“ segir bóndinn.

Veglínan frá Teigsskógi í átt að Hallsteinsnesi.Egill Aðalsteinsson

Íbúar Patreksfjarðar, Tálknafjarðar og Bíldudals eru núna einu þéttbýlisbúar landsins sem þurfa að aka á malarvegum til að tengjast þjóðvegakerfi landsins. Á sunnanverðum Vestfjörðum höfðu menn vonast til að þessari áþján malarveganna myndi ljúka á næsta ári. Biðin eftir slitlaginu verður hins vegar mun lengri.

Þórdís Sif Sigurðardóttir, bæjarstjóri Vesturbyggðar.

Ástæðan er niðurskurður ríkisstjórnarinnar á framlögum til vegagerðar, sem veldur því að þverun Gufufjarðar og Djúpafjarðar seinkar að öllum líkindum um þrjú ár. Í stað verkloka árið 2024 stefnir núna í að þau verði árið 2027.

„Við krefjum þess að þeim verði ekki seinkað. Þetta eru gríðarlega mikilvægar samgöngur hér á milli svæðanna,“ segir Þórdís Sif Sigurðardóttir, bæjarstjóri Vesturbyggðar.

Horft frá Hallsteinsnesi til vesturs í átt að Skálanesi. Vegfylling er komin út í Djúpafjörð.Egill Aðalsteinsson

„Þessu er að seinka um nokkur ár. Þetta átti allt að vera tilbúið á svipuðum tíma. Þetta eru sjálfsagt einhver þrjú til fimm ár þangað til þetta verður tilbúið. Og ég held að sérstaklega í Vesturbyggð hljóti menn að vera óánægðir með það. Að þurfa að nota Ódrjúgshálsinn áfram,“ segir Leifur í Djúpadal.

Hér má sjá frétt Stöðvar 2:

Teigsskógur Reykhólahreppur Vegagerð Samgöngur Vesturbyggð Tálknafjörður

Tengdar fréttir

Eins og vegurinn detti af himnum ofan í Teigsskóg

Verktakinn sem er að leggja veginn umdeilda um Teigsskóg stefnir að því að hann verði opnaður umferð í lok októbermánaðar. Hann segir vel hafa tekist að varðveita skóginn en athygli vekur að ekki er gert ráð fyrir neinum áningarstað fyrir vegfarendur.

Landeigendur ekki áfjáðir í áningarstað í Teigsskógi

Landeigendur á svæðinu sem Teigsskógarvegur mun liggja um í Þorskafirði, það er nýr kafli Vestfjarðavegar milli Þórisstaða og Hallsteinsness, voru ekki áfjáðir í að áningarstaður yrði gerður á svæðinu fyrir almenning.

Þorskafjarðarbrú klárast hálfu ári á undan áætlun

Horfur eru á að nýja brúin yfir Þorskafjörð verði opnuð umferð meira en hálfu ári á undan áætlun. Í dag var byrjað að leggja bundið slitlag á vegina sem tengja brúna við vegakerfið.

Bundið slitlag lagt á nýja þjóðveginn um Teigsskóg

Klæðningarflokkur frá Borgarverki hóf í dag að leggja bundið slitlag á nýja þjóðveginn um Teigsskóg í utanverðum Þorskafirði. Stefnt er að því að vegurinn umdeildi verði opnaður umferð í lok októbermánaðar.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið