„Bein af­leiðing skipu­lags með ofur­á­herslu á einka­bíla­um­ferð“

„Fjölmargir íbúar höfuðborgarsvæðisins hafa eytt umtalsverðum tíma í bílaröðum undanfarna morgna. Ástandið er að sönnu verst um mánaðarmótin ágúst-september á hverju ári þegar skólarnir og vinnustaðirnir fara á fullt eftir sumarfrí. Svo lagast hún aðeins en ekki meira en það,“ segir Dagur B. Eggertsson borgarstjóri á Facebook.

Þéttara skipulag leiðin fram á við

Dagur segir að háværir hópar og einhverjir úr hópi eldri kynslóðar sérfræðinga, sem lærðu um það leyti sem þessi stefna varð ofan á, trúi enn þá á að lausnin á þessu sé að halda gamallri stefnu áfram. 

„Það er því miður rangt. Ítarlegar greiningar og sameiginleg stefnumótun sveitarfélaganna á höfuðborgarsvæðinu sem bar saman valkosti fyrir framtíðarvöxt höfuðborgarssvæðisins sýndi afgerandi fram á að lausnin nú og til framtíðar felst í betra og þéttara skipulagi með hverfum þar sem hægt er að sækja nærþjónustu, fleiri og betri valkostum í samgöngum með áherslu á betri aðstæður gangandi og hjólandi - meðal annars með auknum innviðafjárfestingum - en síðast en ekki síst stóreflingu almenningssamgangna, með fjárfestingu í nýju hraðvagnakerfi, Borgarlínu, sem fengi forgang í umferðinni. Annars gengur umferðin ekki upp og óbreytt stefna þar sem fjölgun íbúa fylgdi fjölgun bílferða í sama hlutfalli og áður myndi þýða enn meiri umferðartafir. Ekki síst fyrir þá sem eru í bíl.“

Svarað með dylgjum um einkabílahatur

Dagur segir þessum greiningum, niðurstöðum og staðreyndum ótrúlega sjaldan svarað með rökum heldur dylgjum um einkabílahatur og fleira. Ekkert sé fjarri sanni en að einkabílahatur ráði för.

„Hér gildir að hugsa í lausnum og taka mið af því sem við vitum og fylgja því eftir. Það skiptir gríðarlega miklu máli að hafa skýra framtíðarsýn um skipulagsmál, samgöngumál og þróun höfuðborgarsvæðisins. Það skiptir þess vegna miklu máli að ramma slíka sýn ekki aðeins inn með orðum heldur samkomulagi til langs tíma þar sem fjárfestingar fylgja slíkri sýn og alvöru lausnum eftir.“

Þetta segir Dagur samgöngusáttmálann svokallaða hafa snúist um og hann geri það enn. Hann sé samningur sem eigi að halda til langs tíma, hvað sem mismunandi ríkisstjórnum líður eða meirihlutum í sveitarstjórnum líður. 

„Enda naut hann yfirgnæfandi stuðnings flokka á Alþingi og þverpólitísks stuðnings í öllum sveitarfélögum á höfuðborgarsvæðinu. Ég held reyndar að við skiljum öll þörfina á þessari nálgun.“

Líka mikilvægt þeim sem vilja einkabílinn

Dagur segir að hann hafi djúpa sannfæringu fyrir mikilvægi samgöngusáttmálans og þeirrar skýru langtímasýnar sem að baki honum býr. Það sé jafnframt algjörlega eðlilegt að uppfæra hann, líkt og nú sé verið að gera. Það sé raunar fullt tilefni fyrir fólk til að hugleiða mikilvægi þess að fylgja þessum málum fast og vel eftir, hvort sem það situr fast í bílum sínum eða notar aðra ferðamáta.

„Við eigum nefnilega öll sameiginlega hagsmuni af því að fjölbreyttar fjárfestingar í lykil-samgönguinnviðum gangi eftir - ekki síst þeir sem sjá fyrir sér að nota einkabíl áfram sem meginn samgöngumáta. En líka hin sem brenna fyrir betri almenningssamgöngum og innviðum fyrir gangandi og hjólandi. Og ef við höldum kúrs fáum við betur skipulagt höfuðborgarsvæði, heilsusamlegra borgarumhverfi, áhugaverðari og öruggari hverfi með meiri nærþjónustu, meiri lífsgæði, betri loftgæði og betri þróun í loftslagsmálum einnig.“