Grótta með tvo sigra og Vestri vann á heima­velli

Vestri og Leiknir mættust í Lengjudeild karla á Ísafirði í kvöld. Liðin voru hlið við hlið í botnbaráttunni, einungis með lið Ægis fyrir neðan sig í töflunni.

Það var því mikið í húfi og heimamenn í Vestra voru þeir sem fóru sigri hrósandi af velli. Vladimir Tufegdzig skoraði eina mark leiksins fyrir Vestra á 78. mínútu en Daníel Finns Matthíasson misnotaði víti fyrir Leikni í fyrri hálfleiknum.

Vestri er kominn með níu stig í töflunni og lyftir sér uppfyrir Njarðvík. Leiknir situr í 11. sæti með fimm stig.

Á Seltjarnarnesi vann Grótta góðan sigur á Selfyssingum. Arnar Þór Helgason skoraði eina mark leiksins á 34. mínútu en Þór Llores Þórðarson fékk rautt spjald í liði Selfyssinga í síðari hálfleik.

Liðin eru bæði með tíu stig í 6. og 7. sæti deildarinnar.

Fylkir missti af góðu tækifæri

Lið Fylkis í Lengjudeild kvenna tók á móti Gróttu á heimavelli sínum í Árbænum í kvöld. Fyrir leikinn var Fylkir í þriðja sæti deildarinnar og gat lyft sér uppfyrir lið HK með sigri í kvöld.

Það tókst þó ekki. Ariela Lewis kom Gróttu yfir á 20. mínútu en Guðrún Karítas Sigurðardóttir jafnaði metin tveimur mínútum síðar.

Á 48. mínútu skoraði María Lovísa Jónasdóttir sigurmarkið í leiknum fyrir Gróttu og tryggði liðinu 2-1. HK er því áfram í öðru sæti Lengjudeildarinnar með 17 stig en fylkir er í þriðja sæti með 16. Grótta er í fjórða sæti með 13 stig.