Hætta starfsemi ungmennabúða á Laugarvatni

Máni Snær Þorláksson skrifar 21. mars 2023 11:45

UMFÍ hefur starfrækt ungmennabúðir á Laugarvatni frá árinu 2019. Aðsend

Ungmennafélag Íslands (UMFÍ) hefur ákveðið að hætta starfsemi ungmennabúða á Laugarvatni. Í tilkynningu frá félaginu kemur fram að rekja megi ákvörðunina til myglu og rakaskemmda sem fundust í febrúar á þessu ári.

Ungmennabúðunum var lokað tímabundið í síðasta mánuði vegna myglu og rakaskemmda. Bláskógabyggð á húsnæðið og upplýsti UMFÍ að sveitarfélagið ætlaði ekki að fara í nauðsynlegar framkvæmdir til að hægt væri að halda starsfemi þar áfram. Bláskógabyggð bauð hins vegar UMFÍ að kaupa húsnæðið og sjá þá um framkvæmdirnar.

Í tilkynningu frá UMFÍ kemur fram að stjórn og stjórnendur félagsins hafi skoðað og metið framkvæmda- og kostnaðaráætlanir í tengslum við það til framtíðar. Það hafi þó verið mat þeirra að áætlaður kostnaður við kaup og framkvæmdir væri af þeirri stærðargráðu að ekki væri skynsamlegt að takast að fara í það.

„Stjórn UMFÍ þykir afar miður að þetta sé niðurstaðan og þar með tilneydd til að ljúka starfsemi Ungmennabúðanna á Laugarvatni.

Öllum þeim sem komið hafa að starfi Ungmennabúða UMFÍ í gegnum tíðina, kennurum, nemendum og öðrum gestum í gegnum árin vill UMFÍ þakka innilega fyrir ómetanlegt framlag. Við vonum að þær minningar sem starfsemi búðanna skilur eftir verði þátttakendum gott veganesti til framtíðar.“

Bláskógabyggð Félagasamtök Börn og uppeldi Skóla - og menntamál Mygla

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.