Leggja til að borgin reisi upphituð strætóskýli

Árni Sæberg skrifar 19. mars 2023 15:41

Sjálfstæðismenn í Reykjavík vilja að strætófarþegar geti beðið inni í hlýjunni eftir strætó. Vísir/Vilhelm

Borgarfulltrúar Sjálfstæðisflokksins munu leggja fram tillögu þess efnis að ráðist verði í uppsetningu skjólgóðra og upphitaðra biðskýla fyrir strætisvagnafarþega í Reykjavík, á næsta fundi borgarstjórnar.

„Borgarstjórn samþykkir að ráðist verði í uppsetningu skjólgóðra og upphitaðra biðskýla fyrir strætisvagnafarþega í Reykjavík. Slíkum skýlum verði komið fyrir á fjölförnum biðstöðvum í öllum hverfum borgarinnar í því skyni að bæta aðstæður farþega og fjölga viðskiptavinum Strætó.“

Svo hljóðar tillagan sem lögð verður fram á fundi borgarstjórnar á þriðjudaginn næstkomandi.

Þetta kemur fram í færslu Kjartans Magnússonar, borgarfulltrúa Sjálfstæðisflokksins, í Facebook-hópi Félags strætófarþega.

Þar segir hann að mikil framþróun hafi orðið í gerð biðskýla á undanförnum árum. Margar erlendar borgir leggi sig fram um að reisa lokuð biðskýli, sem verja farþega fyrir veðri og vindum og eru jafnvel upphituð.

„Tímabært er að Reykjavík taki þátt í þessari þróun. Ákjósanlegt væri að reisa slík skýli við fjölmenna vinnustaði og skóla,“ segir Kjartan.

Strætó Borgarstjórn Reykjavík Sjálfstæðisflokkurinn Samgöngur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.