Segir Daða hafa verið „vilja­laust verk­færi“ í höndum Nonna

Arnar Kormákur Friðriksson, verjandi Daða, krafðist vægustu refsingar sem lög leyfa við málflutning í gær á lokadegi aðalmeðferðar. Daði er ákærður fyrir aðild að stórfelldu fíkniefnlagabroti auk þátttöku í skipulagðri brotastarfsemi. Þá er hann einnig ákærður fyrir ræktun og sölu fíkniefna. 

Hann er á meðal fjögurra sakborninga sem ákærðir eru fyrir að hafa ætlað að flytja inn 100 kíló af kókaíni til landsins, sem falin voru í viðardrumbum.

Þátttakan hluti af sjálfskaðandi hegðun

Arnar lýsti því að Daði hefði frá upphafi gengist við hans hlut og sagt skýrt og rétt frá, bæði í skýrslutökum hjá lögreglu og fyrir dómi. Hann útskýrði að daði hefði á þessum tíma verið í neyslu fíkniefna, hefði „leiðst út í ræktun kanabissefna og sölu.“ Hann sagði einstaklinga í þessari stöðu oft upplifa að þeir hafi litlu að tapa.

„Þátttaka í svona er bara hluti af sjálfsskaðandi hegðun,“ sagði Arnar Kormákur. Hann sagðist ekki nefna þetta fyrir vorkunn en þetta skipti verulegu máli fyrir trúverðugleika. „Það er ekki óeðlilegt og ótrúverðugt að maður í þessari stöðu fallist á þetta þrátt fyrir að hafa ekki forsendur á reiðum höndum.“

Þá sagði hann Daða hálfgert eyland í málinu, en hann kom að málinu eftir að innflutningur efnanna hafði átt sér stað. Hlutverk hans var að taka á móti efnunum af Páli Jónssyni, fara með þau í geymsluhúsnæði sem Daði hafði tekið á leigu í Gjáhellu, vigta hluta þeirra og pakka þeim.

Viljalaust verkfæri í höndum Nonna

Lögregla hafði fylgst með hinum mönnunum en hafði ekki upplýsingar um aðkomu Daða fyrr en 4. ágúst, á handtökudeginum.

Hinir mennirnir þrír höfðu allir verið í samskiptum í aðdraganda innflutningsins en enginn af þeim hefur sagst hafa þekkt Daða eða vitað af hans þátttöku.

Nonni tók við fyrirmælum af ónefndum aðila sem kallaði sig ýmis Nonni, Harry eða Trucker.

Arnar Kormákur sagði Daða til happs að samskipti við þennan aðila liggi fyrir. „Þau sýna að hann tók engar ákvarðanir og skipulagði ekki neitt“, sagði hann. „Hann var í raun viljalaust verkfæri í höndum þessa manns.“

Þá gagnrýndi Arnar rannsókn lögreglu og sagði málið greinilega ekki að fullu upplýst þar sem lögregla hafi sagt að enn væri verið að leita að óþekktum aðilum sem tengdust því.

Hann sagði Dafa hafa verið samvinnuþýðan í rannsókn lögreglu og að hann hefði nýtt sér tímann í gæsluvarðhaldi til góðs. Hann stundaði nám við FSU og væri virkur í AA starfi á Litla Hrauni.

Telur þriggja ára fangelsisvist eðlilega refsingu

Hámarksrefsing fyrir fíkniefnainnflutning er tólf ára fangelsisvist.

Arnar Kormákur sagði ótækt að ákvarða refsingu Daða líkt og hann væri „einhver aðalmaður brotsins.“ Hann sagði það ekki standast neina skoðun að sá sem eigi veigaminni þátt fái álíka refsingu og sá sem skipuleggur brotið. 

Ef það yrði flutt inn tonn af fíkniefnum, fengu bara allir tólf ára dóm? Fengu allir jafn mikinn dóm, jafnframt þeir sem skipulögðu innflutning á tonninu og sá sem lánaði bílskúrinn sinn til að geyma efnin?

Arnar Kormákur lauk málflutningi sínum á að segjast telja eðlilega refsingu Daða þriggja ára fangelsi. Hann miðaði við Skútumálið svokallaða árið 2009, þar sem aðili sem tók við efnunum fékk þriggja ára dóm. 

„Þar um bil og eitthvað til viðbótar fyrir peningaþvætti er eðlileg refsing.“

Nánari umfjöllum um aðkomu Daða og hinna mannanna má lesa í ítarlegri fréttaskýringu Vísis um málið.