Kenndu grænmetisætu í endurhæfingu að grilla nautalund

Endurupptaka Jakobs á kjötneyslu er ekki einangrað atvik heldur er hann á meðal nokkurs fjölda grænmetisæta eða grænkera sem nú um mundir virðast hverfa í talsverðum mæli aftur til fyrri hátta, að borða kjöt.

„Manni fallast eiginlega bara hendur að vera hérna með þessum mönnum, á milli tveggja turna. Haldið þið að ég ráði við þetta?“ spyr Jakob.

Verkefnið er að grilla hina fullkomnu nautasteik og þá eru að sögn reynsluboltanna nokkur atriði sem verða að vera á hreinu.

Hverju er fólk að klúðra? Óskar: „Helstu mistökin eru að fólk er að fikta of mikið í kjötinu. Það er að snúa því. Hreyfa það. En það verður að leyfa því að eldast.“ Sigurður bætir því við að þegar kjötið hefur eldast þurfi að hvíla það í nokkrar mínútur: „Ef það hvílist ekki og þú byrjar strax að skera í það þá rennur safinn út um allt.“

Fiskar grænmeti

Jakob spyr kokkana hvernig þetta horfi við þeim út frá heilsufarslegu sjónarhorni, hvort hollara sé að sleppa kjötinu. Svo er ekki að sögn Sigurðar: „Þá ertu alltaf smá vannærður. Það vantar alltaf aðeins eitthvað í þig. Alltaf hvítur í framan…“ Jakob: „Eins og konan mín segir að ég sé alltaf þreyttur. Gæti það skrifast á þetta?“ Kokkarnir: „Gæti? Þetta gerir það.“

Að auki halda þeir því fram að nauta- og lambakjöt, úr dýrum sem alin eru á hreinni og grænni fæðu, sé í raun í einhverjum skilningi ekki svo langt frá því að vera bara í raun grænmeti í einhverjum skilningi. Að ónefndum fiskunum, en Sigurður spyr þeirrar áleitnu spurningar: „Er fiskur dýr eða grænmeti?“

Food and Fun hafið

Bent var á það í lok innslagsins að með matreiðslu sinni á nautasteikinni undir leiðsögn Óskars og Sigurðar hafi Jakob í raun verið að hringja inn Food and Fun-hátíðina í ár, sem hófst í gær, miðvikudag. Sigurður Hall, sem hefur haft veg og vanda af hátíðinni í gegnum árin, segir hátíðina í ár nokkuð frábrugðna því sem var fyrir faraldur, þar sem fjöldi staða sem þá tóku þátt eru ekki lengur í rekstri. Það er því talsverð endurnýjun.

Óskar, sem einnig er tengdur hátíðinni, segir: „Það er rosa breiður hópur af matreiðslumönnum á leiðinni; snillingar af Michelin-stöðum og svo af alls konar öðrum stöðum. Bara fara inn á Dineout, þá sérðu hvaða kokkar eru á staðnum. Hvar liggur áhugi þinn á matargerð?“