„Ég vildi bara prófa eitthvað öðruvísi”

Máni Snær Þorláksson skrifar 2. febrúar 2023 15:40

Caitlin yfirgaf starf sitt sem skipsþerna í Miðjarðarhafinu til að vinna á línubátnum Páli Jónssyni. Ice Cold Catch

Hin breska Caitlin Krause hefur vakið töluverða athygli hér á landi fyrir hlutverk sitt í raunveruleikaþáttunum Ice Cold Catch sem sýndir eru á Stöð 2. Caitlin, sem er 27 ára gömul, yfirgaf starf sitt sem skipsþerna á ofursnekkju í Miðjarðarhafinu til að freista gæfunnar á sjónum við strendur Íslands á línubátnum Páli Jónssyni.

Rætt var við Caitlin um sjómennskuna og þættina í útvarpsþættinum Brennslunni á FM957 í morgun. Þar var Caitlin meðal annars spurð hvers vegna hún ákvað að yfirgefa hlýjuna í Miðjarðarhafinu til þess að vinna í kuldanum á sjónum við Ísland.

„Ég vildi bara prófa eitthvað öðruvísi. Ég ólst upp við að veiða, ég elska að veiða og ég hugsaði hvort ég ætti ekki að prófa þetta, sjá hvort stelpa eins og ég gæti unnið þetta starf. Mig hefur líka alltaf langað til að koma til Íslands.”

Klippa: Brennslan - Caitlin úr Ice Cold Catch í spjalli um lífið á línubátnum Páli Jónssyni

Caitlin segir þá að starfið hafi verið erfiðara og erfiðara með hverjum deginum og hverri vikunni. Í því varð hún til að mynda sjóveik í fyrsta skipti á ævinni. „Ég hafði ekki upplifað það áður. Ég held að það hafi bara verið út af lyktinni af fisknum og rugginu í bátnum, lyktin var hræðileg.”

Þrátt fyrir að starfið hafi verið erfitt og að því hafi fylgt sjóveiki þá segir Caitlin að þessi reynsla hafi í heildina verið mögnuð. Hún segir að það besta við þetta allt saman hafi verið að kynnast áhöfninni á Páli Jónssyni. Áhöfnin hafi haldið móralnum góðum og látið hana hlæja.

„Hún var án efa besti parturinn við þetta. Þetta er frábært fólk, þau komu mér í gegnum þetta.”

Brennslan FM957 Bíó og sjónvarp Kvikmyndagerð á Íslandi Sjávarútvegur