Lífið

Harma­gedd­on vaknar til lífs á ný: „Áhorfendur mega búast við látum“

Jakob Bjarnar skrifar
Frosti Logason er mættur aftur með Harmageddon og hann lofar látum.
Frosti Logason er mættur aftur með Harmageddon og hann lofar látum. vísir/vilhelm

Frosti Logason fjölmiðlamaður endurvekur útvarpsþáttinn Harmageddon, nú sem myndhlaðvarp og segist í samtali við Vísi ætla þar að segja það sem allir eru að hugsa en fáir þori að segja.

Frosti Logason, sem áratugum saman var annar umsjónarmaður útvarpsþáttarins Harmageddon, hefur boðað endurkomu hins umdeilda og vinsæla þáttar en með breyttu sniði.

Harmageddon hefur legið í láginni allt síðan fram komu ásakanir um á hendur Frosta um óásættanlega framgöngu, áreiti og hótanir, gegn fyrrverandi kærustu sinni. Frosti sagði í kjölfarið upp störfum hjá Sýn og fór á sjóinn. Hann er nú kominn í land og sendi frá sér tilkynningu á samfélagsmiðlum nú í morgun þar sem hann boðar endurkomu þáttarins.

„Að þessu sinni verður þátturinn fáanlegur á efnisveitunni www.brotkast.is. Brotkast er lítið fjölskyldufyrirtæki sem við eiginkona mín, Helga Gabríela höfum sett á fót og vonum við að það eigi eftir að vaxa vel og dafna á næstu misserum.

Frosti segir að fyrirtækið sé að verulegu leyti fjármagnað með sjómennskunni sem hann hefur stundað frá því að Harmageddon fór í pásu. Baldur Kristjánsson

Við byrjum með 6 mismunandi þætti en eigum eftir að bæta við þáttastjórnendum á komandi vikum og mánuðum. Mér þætti vænt um að vinir mínir og kunningjar vildu styrkja þetta framtak okkar með því að næla sér í áskrift á einungis 1.669kr á mánuði. Góðar stundir,“ segir Frosti í tilkynningu á Facebook.

Frosti segir í samtali við Vísi að þetta hafi verið í pípunum allt síðan hann hætti hjá Sýn í júlí á síðasta ári.

„Það hefur tekið tíma að koma þessu á fót og ég var á sjónum mest allan tímann samhliða því að ég vann að þessu,“ segir Frosti. Hann segir í mörg horn að líta þegar verkefni sem þetta er annars vegar, það þurfi að setja upp kerfi, stúdíó, vefsíðu, áskriftakerfið, smáforrit fyrir síma og svo framvegis. 

Fjármagnað með sjómennskunni

Frosti segir enga fjárfesta aðra en þau hjónin koma að þessu.

„Þetta er ég að fjármagna með verðmætum sem ég dró úr Atlantshafinu. Ég hef verið að vinna að þessu hægt og rólega og nú er stundin runnin upp. Í dag opnuðum við vefinn og áskriftagáttina. Fólk getur gengið þar að efni, Harmageddonþætti minnst tvisvat í viku. Þetta eru allt vídeópodcöst, nú er Harmageddon í fyrsta skipti í mynd,“ segir Frosti.

Máni Pétursson, sem hefur verið hinn hluti tvíeykisins sem myndað hefur Harmageddon, verður ekki með að þessu sinni, að sögn Frosta.

„Ég er með mér til halds og trausts tæknimann sem kemur sterkur inn. Ingimar Elíasson, meinfyndinn og skemmtilegur. Þátturinn er settur upp þannig að ég fer yfir málefni líðandi stundar og ráðandi er mitt sjónarhorn á fréttir hvers dags fyrir sig. Þannig er þetta svipað Harmageddon, eins og sá þáttur var í gegnum tíðina, en þó með nýjum áherslum, nýjum dagskrárliðum sem fylgja nýju formati.“

Frosti var fyrst að velta því fyrir sér, þegar hann var að bræða þetta með sér úti á reginhafi, að láta þáttinn heita Brottkast en ákvað svo að bjóða upp á nýyrðið Brotkast.vísir/vilhelm

Nafn þáttarins er sérstakt. „Já, ég og eiginkona mín stofnuðum þetta fyrirtæki, Brotkast. Ég var að hugsa um gömlu hljómsveitarnöfnin, Trúbrot og Brimkló. Ákvað að búa til nýtt íslenskt orð eins og Árni Johnsen gerði á sínum tíma,“ segir Frosti. Hann segir að þetta hafi hann verið að bræða með sér meðan hann var úti á sjó.

Áhorfendur mega búast við látum

„Ég var fyrst að láta mér detta í hug brottkast.“

Já, sem sjómenn stunda í stórum stíl?

„Nei. Það er einmitt ekki svo. Það er ekkert til í að við sjómenn stundum það. Reyndar kom mér á óvart hversu vel sjómenn ganga um hafið og merkilegt að kynnast þessu, ekki svo mikið sem eitt karamellubréf fer út í sjó og allur fiskur hirtur,“ segir Frosti sem var á línubátum, fyrst á Vésteini GK eða Grindavík, og svo Háey 1, sem gerður er út frá Raufarhöfn.

„Tveir bestu línubátar flotans. Stórkostleg áhöfn og skipstjórar,“ segir Frosti. Og bætir því við að nýyrðið vísi til enska orðsins „broadcast“ og geti vel átt við um vídeóhlaðvörp.

„Áhorfendur mega búast við látum, mikið fjör og ekkert skafið af því. Það er svo þægilegt, þegar maður er sinn eigin herra, að geta sagt það sem allir eru að hugsa en fáir þora að segja.“


Tengdar fréttir

Frosti kominn í leyfi frá störfum

Frosti Logason, dagskrárgerðarmaður og sjónvarpsmaður á Stöð 2, er kominn í ótímabundið leyfi frá störfum sínum hjá Stöð 2. Þetta segir Þórhallur Gunnarsson, framkvæmdastjóra miðla Stöðvar 2, í samtali við fréttastofu.

Frosti gengst við á­sökunum fyrr­verandi kærustu

Frosti Logason, dagskrárgerðarmaður og sjónvarpsmaður á Stöð 2, segist gangast við ásökunum fyrrverandi kærustu sinnar um andlegt ofbeldi en viðtal við hana birtist í Stundinni í morgun. Hann er kominn í leyfi frá störfum hjá Stöð 2.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.