Innlent

Sigurður svo öflugur að ekki hafi verið til­efni til að aug­lýsa starfið

Elísabet Inga Sigurðardóttir og Bjarki Sigurðsson skrifa
Willum Þór Þórsson, heilbrigðisráðherra segir að almenna reglan sé auðvitað að auglýsa í störf og að það geri hann. Sigurður Helgi sé þó öflugur stjórnandi og því ekki talin ástæða til að auglýsa starfið.
Willum Þór Þórsson, heilbrigðisráðherra segir að almenna reglan sé auðvitað að auglýsa í störf og að það geri hann. Sigurður Helgi sé þó öflugur stjórnandi og því ekki talin ástæða til að auglýsa starfið. vísir

Heilbrigðisráðherra segist fylgja þeirri reglu að auglýsa í opinber störf en að í tilviki Sigurðar Helga Helgasonar, nýskipaðs forstjóra Sjúkratrygginga, sé hann svo öflugur stjórnandi að ekki hafi verið talin ástæða til að auglýsa stöðuna.

Í gær greindum við frá því að Sigurður Helgi Helgason, skrifstofustjóri í fjármála- og efnahagsráðuneytinu hafi verið skipaður forstjóri Sjúkratryggingar. Samkvæmt heimildum fréttastofu var Sigurður skipaður án þess að starfið væri auglýst.

Ákvörðun sem tryggi samfellu

„Almenna reglan er auðvitað að auglýsa og við fylgjum henni. Það er hins vegar heimild til þess að skipa í stöður og þarna erum við með stjórnanda sem hefur bakgrunn og þekkingu, sérþekkingu á málefnum þessarar stofnunar tilteknu og málefnum heilbrigðisþjónustunnar. Til þess að tryggja samfellu, það er öflugur stjórnandi að fara frá og til að tryggja samfellu í starfsemi stofnunarinnar þá tók ég þá ákvörðun um að skipa Sigurð Helgason í embætti sjúkratrygginga.“

Sagði Willum Þór Þórsson, heilbrigðisráðherra í samtali við Bjarka Sigurðsson fréttamann að loknum ríkisstjórnarfundi í morgun.

Svo hæf að ekki var talin ástæða til að auglýsa starfið

Í haust skapaðist mikil umræða um umdeilda ákvörðun Lilju Alfreðsdóttur menningarmálaráðherra um að skipa Hörpu Þórsdóttir í embætti þjóðminjavarðar án auglýsingar. Lilja sagði að Harpa væri mjög hæf.

„Og Harpa Þórsdóttir, sem hefur verið safnstjóri í Listasafni Íslands, hún er sérstaklega hæf og uppfyllir öll þau skilyrði sem þurfa að vera til staðar,“ sagði Lilja að loknum ríkisstjórnarfundi þann 30. ágúst 2022.

Í kjölfarið ákvað Katrín Jakobsdóttir, forsætisráðherra að ráðist í gerð samantektar um flutning embættismanna.

Fylgir þeirri reglu að auglýsa en ekki í tilviki Sigurðar

Þessi heimild sem þú nýtir er undantekningaheimild. Er hún ekki orðin að almennri reglu hjá þessari ríkisstjórn?

„Ég skil þetta þannig að þetta sé í undantekningartilvikum. Ég hef fylgt þeirri reglu að auglýsa en í þessu tilviki erum við með öflugan stjórnanda með öflugan bakgrunn sem talar mjög vel inn í það sem til þarf til að leiða þessa stofnun og þess vegna tók ég þá ákvörðun.“


Tengdar fréttir

Skipaður for­stjóri Sjúkra­trygginga án aug­lýsingar

Sigurður Helgi Helgason, skrifstofustjóri skrifstofu stjórnunar og umbóta í fjármála- og efnahagsráðuneytinu, hefur verið skipaður forstjóri Sjúkratryggingar. Þetta staðfestir Sigurður í samtali við Vísi og segist spenntur að taka við starfinu. Stofnunin heyrir undir heilbrigðisráðuneyti Willums Þórs Þórssonar.

Segir skipun þjóðminjavarðar afar farsæla

Menningarmálaráðherra segir skipun hennar í stöðu þjóðminjavarðar án auglýsingar afar farsæla. Gagnrýni sem hafi komið fram í málinu hafi verið lærdómsrík og skili því að nú megi æðstu stjórnendur höfuðsafnanna ekki starfa lengur en í fimm ár. 

Segir samantekt forsætisráðuneytisins ófullnægjandi

Þórunn Sveinbjarnardóttir, formaður stjórnskipunar- og eftirlitsnefndar Alþingis, segir að ný samantekt forsætisráðuneytisins um flutning embættismanna á milli embætta, sé ófullnægjandi og að nefndin muni taka upp þráðinn. Í samantektinni séu ekki skipanir utan stjórnarráðsins.

Skipað í em­bætti án aug­lýsingar í fimmtungi til­fella

Skipað var í embætti í kjölfar auglýsingar í um áttatíu prósent tilfella á tímabilinu 2009 til 2022. Í tuttugu prósent tilfella var embættismaður fluttur í annað embætti ýmist á grundvelli flutningsheimildar í lögum eða sérstakra lagaheimilda. Ef flutningar embættismanna sem gerðir voru í tengslum við breytingar á skipulagi stofnana eða ráðuneyta eru ekki taldir með, fer hlutfall skipana í kjölfar auglýsingar upp í rúm níutíu prósent.

Segja auglýsingu hafa verið tilbúna en svo barst „tillaga“

Búið var að smíða auglýsingu um stöðu þjóðminjavarðar þegar sveigt var af leið og ákveðið að skipa í stöðuna án þess að auglýsa hana. Svo virðist sem tillaga hafi borist á borð ráðherra sem varð þess valdandi að staðan var ekki auglýst.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×