Handbolti

Tólf íslensk mörk í öruggum sigri Gummersbach

Hjörtur Leó Guðjónsson skrifar
Hákon Daði var frábær í kvöld.
Hákon Daði var frábær í kvöld. Getty Images

Íslendingalið Gummersbach, undir stjórn Guðjóns Vals Sigurðssonar, vann öruggan sex marka sigur er liðið heimsótti Erlangen í þýsku úrvalsdeildinni í handbolta í kvöld, 31-37. Hvorki fleiri né færri en tólf íslensk mörk litu dagsins ljós í leiknum.

Gengi liðanna hefur ekki verið upp á marga fiska í deildinni undanfarið. Fyrir leikinn í kvöld var Gummersbach án sigurs í seinustu þrem deildarleikjum og Erlangen hafði tapað seinustu fimm.

Það var því mikið undir. Það voru gestirnir í Gummersbach sem tóku frumkvæðið og náðu mest sjö marka forystu í fyrri hálfleik. Liðið leiddi með fjórum mörkum þegar gengið var til búningsherbergja, staðan 15-19.

Gestirnir héldu forystunni í fimm til sex mörkum allan síðari hálfleikinn og unnu að lokum nokkuð öruggan sex marka sigur, 31-37. Hákon Daði Styrmisson var næst markahæsti leikmaður vallarins með sjö mörk úr jafn mörgum skotum og Eyjamaðurinn Elliði Snær Viðarsson skoraði fimm mörk á línunni.

Með sigrinum lyftir Gummersbach sér upp fyrir Erlangen í töflunni og er nú með 16 stig í áttunda sæti eftir 15 leiki, einu stigi meira en Erlangen sem hefur leikið einum leik meira.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.