Innlent

Segir Japani vilja læra af Ís­lendingum í jafn­réttis­málum

Margrét Helga Erlingsdóttir skrifar
efi_5855-01.jpeg

Japönsk yfirvöld eiga mikið verk fyrir höndum en þau vilja jafna stöðu kynjanna og læra af Íslandi í þeirri vegferð að sögn Guðna Th. Jóhannessonar, forseta Íslands, en Japanir sitja í 116. sæti jafnréttislista Alþjóðaefnahagsráðsins.

Japanskir ráðamenn fengu Guðna til að flytja opnunarávarp jafnréttisþingsins World Assembly for Women um liðna helgi.

Í opnunarávarpi Guðna í Tókýó gerði hann ráðamönnum grein fyrir því að margir samverkandi þættir hefðu stuðlað að þeim árangri sem Ísland hefur náð í jafnréttismálum.

„Meðal annars löggjöf um foreldraorlof og löggjöf um sömu laun óháð kyni og jafnlaunavottun og þar fram eftir götunum og þar að auki væri spurning um kynjajafnrétti ekkert mál lengur á vettvangi íslenskra stjórnmála til dæmis. Það þætti bara sjálfsagt að við værum á þeim stað sem við erum og enginn vildi horfa til fortíðar þar,“ segir Guðni.

Guðni segist þó hafa haldið því til haga að Ísland sé engin jafnréttisparadís og að enn sé verk að vinna. Ísland hefur þó trónað í efsta sæti jafnréttislista Alþjóðaefnahagsráðsins í rúman áratug en Japan er í 116. sæti.

Guðni ræddi við helstu ráðamenn í Japan og tók þátt í alls konar málþingum um jafnrétti.Forseti Íslands

Hvað er þess valdandi að Japanir eru svona neðarlega á listanum?

„Mikil íhaldssemi,“ útskýrir Guðni sem heldur áfram. „Rótgrónar hugmyndir um hlutverk kynjanna í samfélaginu og innan heimilis og japanskir karlmenn vinna langan vinnudag og ætlast svo margir til þess þegar heim er komið þurfi þeir ekki að ómaka sig við heimilisstörf eða uppeldi og þessu þarf að breyta því japanskt samfélag er líka að breytast.“

Hlutfall aldraðra sé orðið ansi hátt og fæðingartíðni lág.

„Samkeppnishæfni ríkja er háð því að þátttaka á vinnumarkaði sé mikil og þetta samfélag þarf á því að halda að konur njóti jafnra tækifæra en það er hluti af stefnu stjórnvalda að skipta hér um kúrs og þá gleður það mig, sem fulltrúa okkar Íslendinga, að það er horft til þeirra breytinga sem orðið hafa til batnaðar í íslensku samfélagi í þessum efnum.“

Samfélagið hagnast á auknu jafnrétti

Guðni ræddi við forsætisráðherra Japans, jafnréttismálaráðherra og tók auk þess þátt í alls konar viðburðum og málþingum um helgina. Hann segir að erfitt sé að leggja mat á það hvort ráðamönnum í Japan sé alvara með að vilja bæta sig í jafnréttismálum en segist hafa bent á að jafnrétti kynjanna sé ekki aðeins réttlætis og sanngirnismál heldur líka „beinhart hagsmunamál, ef menn vilja hagvöxt, vellíðan og velsæld í samfélaginu.“

„Ef það eru hér einhverjir íhaldssamir menn sem trúa ekki á jafnrétti sem réttlætismál og sanngirnismál þá er nú kannski von til þess að þeir sjái ljósið ef þeim er leitt fyrir sjónir að samfélagið allt muni beinlínis hagnast á auknu jafnrétti.“

Senn líður að lokum Japansferðar forsetans en næst fer hann, ásamt Elizu Reid forsetafrú, til Strassborgar í Frakklandi til að taka þátt í dagskrá og fundum í tengslum við formennsku Íslands Evrópuráðinu.


Tengdar fréttir

Forseti Íslands og forsetafrú til Strassborgar

Forseti Íslands, Guðni Th. Jóhannesson og Eliza Reid forsetafrú munu heimsækja Evrópuráðið í Strassborg í Frakklandi dagana 6.-7. desember.  Þar mun forsetinn taka þátt í dagskrá og fundum í tengslum við formennsku Íslands í ráðinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.