Innlent

Læknir fékk þriggja mánaða dóm fyrir brot gegn dætrum sínum

Árni Sæberg skrifar
Læknirinn hefur meðal annars starfað hjá Heilbrigðisstofnun Vestfjarða.
Læknirinn hefur meðal annars starfað hjá Heilbrigðisstofnun Vestfjarða. Vísir

Karlmaður, sem starfað hefur sem læknir á Vestfjörðum og Húsavík, var á dögunum dæmdur til þriggja mánaða skilorðsbundinnar fangelsisvistar fyrir ofbeldisbrot gegn þremur dætrum sínum. Hann var hins vegar sýknaður af öllum ákæruliðum sem sneru að meintu grófu ofbeldi gegn eiginkonu sinni

Karlmaðurinn var ákærður í níu liðum fyrir ofbeldi gagnvart eiginkonu sinni. Hann var sakaður um að hafa beitt hana líkamlegu ofbeldi þegar hún var ófrísk með því að þrýsta hné sínu í maga hennar og grípa um háls hennar og þrengja að, með þeim afleiðingum að hún átti í erfiðleikum með að kyngja í nokkra daga. Hlaut hún einnig maráverka á hálsi og á sama tíma hóta henni lífláti ef hún færi út af heimili þeirra án hans fylgdar í nokkra daga eftir atvikið.

Hann einnig ákærður fyrir andlegt ofbeldi með því að láta hana borða mat af gólfinu. Þá hafi hann þvingað hana til heimilisverka og neitað um aðstoð þegar konan var fótbrotin. Við það tilefni hafi hann gert grín að henni, hrækt á hana og sparkað í síðu hennar.

Sýknað vegna skorts á sönnun og fyrningu

Sem áður segir var maðurinn sýknaður af öllum ákæruliðum varðandi ofbeldi gagnvart eiginkonunni. Í niðurstöðukafla dómsins segir að í öllum ákæruliðum nema einum hafi maðurinn verið sýknaður þar sem ekki teldist sannað að hann hefði framið þau brot sem honum voru gefin að sök. 

Hjónin hafi í þeim tilvikum verið ein til frásagnar eða framburður vitna byggt á frásögn konunnar mörgum árum eftir meint brot.

Hins vegar var talið að maðurinn hafi gerst sekur um að grípa um háls konunnar og þrengja að með þeim afleiðingum að hún átti í erfiðleikum með að kyngja í nokkra daga og hlaut maráverka á hálsi. Aftur á móti var hann sýknaður þar sem brot hans var heimfært undir ákvæði almennra hegningarlaga þar sem hámarksrefsins er hálfs árs fangelsisvist. 

Samkvæmt ákvæði hegningarlaga fyrnast þau brot sem ekki liggur þyngri refsing við en eins árs fangelsi á tveimur árum. Þar sem brot mannsins var framið árið 2014 var hann sýknaður af því.

Sló á fingur dætranna og læsti þær inni

Karlmaðurinn er einnig ákærður fyrir endurtekið ofbeldi gagnvart þremur dætrum sínum með því að slá á fingur í refsingarskyni og læsa þær inni í herbergi.

Maðurinn gekkst við því að hafa slegið á fingur dætranna en það hafi ekki verið í refsingarskyni. Það hafi verið snerting til að hafa áhrif á hegðun, sem hluti af samræðu. Hann hafi slegið á fingur þeirra með boginni löngutöng eða vísifingri til að ná athygli þeirra og fá þær til að hætta slagsmálum sín á milli.

Af framburði dætranna var talið sannað að maðurinn hafi slegið á fingur þeirra og að þær hafi upplifað það sem svo að það hafi verið í refsingarskyni.

Þá gekkst maðurinn einnig við því að hafa í nokkur skipti lokað þær allar, saman eða hverja í sínu lagi, inni í herbergi eða þvottaherbergi þar sem þær komust ekki út sjálfar.

Það sagði hann hafa verið hluta af uppeldisaðferð, „time out“. Kvaðst hann hafa notað hana þegar dæturnar voru æstar þannig að hann hafi þá tekið eina þeirra út úr hópnum og látið í einveru í stutta stund til að róa hana niður.

Af framburði dætranna auk bréfs frá leikskóla einnar dótturinnar, var talið sannað að maðurinn hafi lokað dæturnar inni í refsiskyni og það hafi valdið þeim kvíða og vanlíðan.

Maðurinn var hins vegar sýknaður af ákærulið um að ofbeldisbrot gegn einni dótturinni með því að hafa í eitt skipti slegið hana flötum lófa í höfuðið. Önnur dóttir sagði í viðtali í Barnahúsi að faðirinn hefði slegið systur hennar. Kvaðst hún halda að hún hefði séð það en var þó ekki viss um það.

 Af þeim sökum var talið að dóttirin og faðirinn hefðu verið ein til frásagnar um meint ofbeldi og því teldist það ekki sannað.

Greiðir miskabætur og þriðjung sakarkostnaðar

Sem áður segir var maðurinn dæmdur til þriggja mánaða skilorðsbundinnar fangelsisvistar. Hann var einnig dæmdur til að greiða dætrum sínum 400 þúsund krónur hverri í miskabætur en sýknaður af miskabótakröfu eiginkonunnar. 

Þá fellur þriðjungur sakarkostnaðar á manninn þar sem hann var sýknaður af langflestum ákæruliðum. Til sakarkostnaður telst til að mynda málsvarnarlaun verjanda hans, tæplega 6,5 milljónir króna, þóknun réttargæslumanns dætranna, um 2,5 milljónir króna og annar sakarkostnaður upp á tæplega hálfa milljón króna.

Dóm héraðsdóms Vestfjarða má lesa í heild sinni hér.


Tengdar fréttir

Ákærði læknirinn hættur eftir tvær vikur í starfi hjá HSN

Læknir sem er ákærður fyrir ofbeldi gegn eiginkonu sinni og þremur börnum hætti í dag störfum hjá Heilbrigðisstofnun Norðurlands. Þetta staðfestir forstjóri stofnunarinnar í samtali við fréttastofu. Hann hafði verið við störf hjá stofnuninni í tvær vikur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.