Innlent

Um­ræðan hafði mikil á­hrif á nætur­lífið: „Þetta var á­kveðinn drauga­bær“

Árni Sæberg skrifar
Geoffrey Þ. Huntingdon-Williams og Arnar Þór Gíslason hafa mikla reynslu af veitingarekstri í miðbæ Reykjavíkur.
Geoffrey Þ. Huntingdon-Williams og Arnar Þór Gíslason hafa mikla reynslu af veitingarekstri í miðbæ Reykjavíkur. Stöð 2/Egill

Lítið sem ekkert var að gera á öldurhúsum miðbæjar Reykjavíkur í gærkvöldi og í nótt. Veitingamenn segja umræðu undanfarinna daga ótvírætt hafa fælt fólk frá næturlífinu.

Lögreglan á höfuðborgarsvæðinu var með stóraukinn viðbúnað í miðbænum í gær vegna árásar sem framin var á skemmtistaðnum Bankastræti club í síðustu viku og ætlaðra hefndaraðgerða eftir hana. Umræða um meinta yfirvofandi hættu í bænum um helgina hafði mikil áhrif þá sem starfa í næturhagkerfinu svokallaða. 

Veitingamaður segir bæinn hafa verið draugabæ í nótt og annar gagnrýnir hversu mikla athygli málið og menn tengdir því hafa fengið í fjölmiðlum undanfarið í samtali við fréttastofu.

„Ég held að fjölmiðlar mættu aðeins passa sig á því að gefa ekki þessum gengjum eða klíkum of mikinn hljómgrunn í sinni umfjöllun. Ég sé engan tilgang með því að gefa þeim meiri athygli en þeir eiga skilið, sem sagt enga. Þar sem þetta bitnar á fjölda fyrirtækja og lífsviðurværi fólks í miðbænum, hvort sem það er starfsfólk eða eigendur staðanna, eins og sannaði sig í gærkvöldi,“ segir Arnar Þór Gíslason, einn eigenda fyrirtækis sem rekur fjölda veitinga- og skemmtistaða í miðbænum. Þeirra á meðal eru Lebowski bar og Irishman.

Hrósar lögreglunni

Hann segist þó fagna auknum sýnileika lögreglunnar í miðbænum í nótt og því að lögreglan hafi ekki reynt að fæla fólk frá næturlífinu. Þá vonar hann að fólk hiki ekki við að fara út á lífið í kvöld.

„Ég vona að kvöldið í kvöld verði betra og fólk átti sig á því að allir staðir sem eru með tilskilin leyfi eru dyraverði og eru að passa upp á öryggi gesta. Ég hvet fólk endilega til að koma í bæinn og að sjálfsögðu ganga hægt um gleðinnar dyr. En ég held að það þurfi ekki að vera óttaslegið. Ef lögreglan segir að það sé öruggt að skemmta sér í miðbænum, þá held ég að það sé rétt, eins og sannaði sig í gær,“ segir hann.

Margir staðir skelltu snemma í lás

Vísir náði tali af Geoffrey Þ. Huntingdon-Willi­ams, einum eigenda Priksins og stofnenda Samtaka reykvískra skemmtistaða, hann sagði að miðbærinn hafi ekki verið upp á sitt besta í gærkvöldi. 

„Það var engin mannmergð í Reykjavík í nótt, þetta var ákveðinn draugabær ef út í það er farið. Fólk virðist hafa tekið það til sín að sækja ekki skemmtanalífið eins og vaninn hefur verið.

Þá segir hann að fjölmargir skemmtistaðir hafi ákveðið að skella fyrr í lás en venjulega vegna gestaþurrðar. Sjálfur ákvað hann að loka Prikinu klukkan hálf tvö í nótt í stað hálf fimm að morgni.

Skemmd epli skemma fyrir restinni

Geoffrey segir það alvarlegt fyrir skemmtistaði að þurfa að loka snemma vegna lítils fjölda djammþyrstra. „Þetta sýnir okkur hversu aðgerðir nokkurra skemmdra epla geta eyðilagt mikið fyrir restinni, við skulum bara orða það þannig. Þetta er mikill skellur og leiðindaástand. Vonandi getum við farið að ala fólk meira á öryggi en ótta hér í Reykjavík.

Þá segir hann að aukinn viðbúnaður lögreglu í nótt sé skiljanlegur og af hinu góða. „Það er ekki viðvera lögreglu sem fældi fólk frá miðbænum í gær,“ segir hann.

Þá slær Geoffrey á sama streng og Arnar Þór og hvetur fólk til að láta sjá sig í bænum í kvöld. „Þó það sé rigning og vesen þá erum við í stuði og viljum bjóða upp á öruggar skemmtanir, það er lykillinn í þessu.


Tengdar fréttir

Ölvun en lítið um átök í miðbænum

Lögregluþjónar á höfuðborgarsvæðinu þurftu að hafa afskipti af þó nokkrum ölvuðum einstaklingum í miðbænum og víðar. Einnig var tilkynnt um líkamsárás í miðbænum þar sem meintur árásarmaður var handtekinn.

Dyra­verðir fóru mis­ró­legir inn í kvöldið

Dyraverðir skemmtistaða í miðbæ Reykjavíkur hafa ekki farið varhluta af auknum viðbúnaði lögreglu í kvöld. Sumir þeirra eru pollrólegir yfir ástandinu á meðan það aðrir eru uggandi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×