Lífið

3 dagar í Idol: Mun koma á­horf­endum á ó­vart hvaða dómari er harðastur við kepp­endur

Elma Rut Valtýsdóttir skrifar
Sigrún Ósk, annar kynnir Idol, segir að von sé á algjörri veislu.
Sigrún Ósk, annar kynnir Idol, segir að von sé á algjörri veislu. Vísir/Vilhelm

„Ég get sagt það með mjög góðri samvisku að fólk á von á góðu. Efniviðurinn er frábær. Það er svo langt síðan þetta var síðast,“ segir Idol kynnirinn Sigrún Ósk sem var gestur í Bítinu í gær.

Idol hefur göngu sína í fimmta sinn nú á föstudaginn. Keppnin hefur ekki verið haldin í þrettán ár og er eftirvæntingin því mikil. Sigrún Ósk og Aron Mola verða kynnar nýju þáttaraðarinnar og segir Sigrún að von sé á algjörri veislu.

„Það er bara komin upp heil kynslóð, fullt af fólki og fullt af hæfileikum sem við höfum ekki séð áður. Margir þessara keppenda voru það góðir að maður var hissa að maður hefði ekki heyrt af þeim,“ segir Sigrún.

„Meira en að segja það að labba þarna inn í ljósin“

Keppendur eru á aldrinum 16-30 ára og búa yfir mismikilli reynslu í því að koma fram. Það kom Sigrúnu þó verulega á óvart hve ófeimnir flestir þátttakendur voru.

„Það er alveg magnað að sjá hvað þau eru til í að láta eitthvað gossa sem maður hefði aldrei þorað sjálfur.“

Sumir höfðu aðeins sungið í sturtunni heima og ráðast því ekki á garðinn þar sem hann er lægstur með því að taka þátt í Idol.

„Sumir höfðu aldrei sungið fyrir framan annað fólk. Hugsið ykkur að byrja þá á því að koma inn og syngja fyrir framan þessa dómnefnd. Það er meira en að segja það að labba þarna inn í ljósin og þar er myndavélin og þar er dómnefndin.“

Hvaða dómari verður harðastur við keppendur?

Dómnefndina skipa þau Birgitta Haukdal, Bríet, Herra Hnetusmjör og Daníel Ágúst. Aðspurð hvaða dómari taki að sér að vera Simon Cowell þessarar þáttaraðar og sé harðastur við keppendur vill Sigrún lítið gefa upp.

„Ég þori ekki að fara með það en ég held að það komi fólki á óvart hver það er.“

Hvaða dómari heldur þú að verði Simon Cowell þessarar þáttaraðar?Vísir/Vilhelm

Viss um að það leynist Emmsjé Gauti meðal keppenda

Í gær gróf Vísir upp skemmtilega Idol minningu frá því að tónlistarmaðurinn Emmsjé Gauti tók þátt í keppninni fyrir sautján árum síðan. Hann komst þó ekki upp úr fyrstu prufum, en er gott dæmi um einstakling sem gafst þó ekki upp á draumnum.

„Ég er viss um það að það sé einhver Emmsjé Gauti í þessari þáttaröð, sem bara átti ekki góðan dag þarna fyrsta daginn, en svo sjáum við eitthvað meira af þeim í framtíðinni.“

Sigrún segir að úr umsóknum sem bárust hafi hundrað einstaklingar verið valdir inn í fyrstu dómaraprufurnar. Allt hafi það verið einstaklingar sem gátu sungið.

„Það var ekki vesenið. En svo er það bara spurning um það hverjir bjóða upp á eitthvað meira en það,“

segir Sigrún en því komumst við að á föstudaginn.

Hér að neðan má hlusta á viðtalið við Sigrúnu í heild sinni.


Idol verður á Stöð 2 á föstudagskvöldum í vetur. Fleiri hundruð söngvarar spreyttu sig í áheyrnaprufunum en að lokum mun einn standa uppi sem sigurvegari. Fyrsti þáttur fer í loftið föstudagskvöldið 25. nóvember. 


Tengdar fréttir

5 dagar í Idol: Svíður enn að hafa til­kynnt rangan keppanda

Þau eru ansi stór fótsporin sem þau Aron Mola og Sigrún Ósk þurfa að feta í í nýrri þáttaröð Idol sem hefur göngu sína á föstudaginn. Kynnarnir Simmi og Jói settu mikinn svip á fyrri þáttaraðir, svo mikinn að þeir voru notaðir sem fordæmi fyrir Idol kynna í öðrum löndum.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.