Innlent

Jón Gunnarsson segist ekki hafa haft í hótunum við Unni Berglindi

Jakob Bjarnar skrifar
Kópavogsbúinn og ráðherrann Jón segist hafa bent Unni á að ekki væri staðið rétt að listum landsfundafulltrúa úr Kópavoginum. Það hafi hann gert í stuttu símtali. Jón vísar því alfarið á bug að hafa haft í hótunum vegna þessa.
Kópavogsbúinn og ráðherrann Jón segist hafa bent Unni á að ekki væri staðið rétt að listum landsfundafulltrúa úr Kópavoginum. Það hafi hann gert í stuttu símtali. Jón vísar því alfarið á bug að hafa haft í hótunum vegna þessa. vísir/vilhelm

Jón Gunnarsson dómsmálaráðherra hefur birt pistil þar sem hann svarar ásökunum sem Unnur Berglind Friðriksdóttir setti fram í morgun. Hann vísar því alfarið á bug að hafa haft í hótunum við hana.

Eins og Vísir greindi frá fyrr í dag þá segir Unnur Berglind, sem er formaður Sjálfstæðisfélags Kópavogs, hún hafa verið tekin í einskonar þriðju gráðu yfirheyrslu af kjörbréfanefnd Sjálfstæðisflokksins. Hún metur það sem svo að kjörbréfanefnd, sem lögmennirnir Brynjar Níelsson, Davíð Þorláksson og Arnar Þór Stefánsson skipa, hafi verið að ganga erinda Bjarna Benediktssonar í harðvítugum formannsslag við Guðlaug Þór Þórðarson.

Þar segir hún meðal annars að hún hafi „fengið „hótunar“ símtöl frá jakkafataklæddum mönnum innan flokksins þar af einum háttsettum sem fór langt út fyrir sitt umboð í ljósi embætti síns.“ Í samtali við DV segir Unnur að Jón Gunnarsson sé einn þessara jakkafataklæddu manna, umræddur háttsettur sem vildi reka erindi Bjarna formanns og hún sé ekki eina manneskjan sem hafi fengið slík símtöl frá Jóni.

Við að sjóða uppúr innan vébanda Sjálfstæðisflokksins

Svo virðist sem það sé við að sjóða uppúr innan flokksins vegna komandi Landsfundar, sem haldinn verður um helgina. Samkvæmt áreiðanlegum heimildum Vísis er mönnum í innsta hring orðið um og ó vegna hinna hatrömu átaka sem sá formannsslagur hefur kallað fram. Fjögur ár eru síðan Landsfundur var haldinn og mönnum greinilega orðið mál og virðast margir meta það sem svo að miklir hagsmunir séu undir, hver verði formaður flokksins.

Landsfundarfulltrúar Sjálfstæðisflokksins kjósa á milli Bjarna Benediktssonar formanns flokksins og Guðlaugs Þórs Þórðarsonar þingmanns og ráðherra í formannskosningum á landsfundi á sunnudag. Svo virðist sem stuðningsmenn þeirra séu að láta kappið hlaupa með sig í gönur.AP/Vilhelm

Jón Gunnarsson hefur nú sent frá sér yfirlýsingu vegna þess sem að sér snýr sem og störfum kjörbréfanefndar.

„Ég hafna því eindregið að hafa beitt nokkurn mann hótunum í tengslum við framangreint.

Ég átti eitt stutt símtal við formann Sjálfstæðisfélagsins í Kópavogi sunnudaginn 30. október þar sem ég benti henni á ólögmæti listanna.

Ég lýsti áhyggjum mínum af því að ef ekki yrði brugðist við væri hætta á að fáir hefðu heimild til setu á landsfundi fyrir hönd Kópavogs.“

Segir ekki réttilega staðið að lista úr Kópavoginum

Jón Gunnarsson, sem býr í Kópavogi, segir að upp hafi verið komin alvarleg staða við val á landsfundarfulltrúum. Hann vísar í lög flokksins þess efnis að halda beri félagsfund sérstaklega til að staðfesta val á fulltrúum. En það hafi farist fyrir í Kópavogi heldur hafi stjórn fulltrúaráðsins látið duga að samþykkja listana.

„Að loknum stjórnarfundi þess ágæta ráðs, en áður en listinn var sendur til skrifstofu Valhallar, var þó fjölda aðila einhliða bætt á listann án þess að það hefði verið borið undir stjórn eða félagsfund. Ekki þarf að fjölyrða um lögmæti þessara vinnubragða.“

Jón segir að hann hafi því meðal annarra hvatt formann Sjálfstæðisfélagsins og formann fulltrúaráðsins í Kópavogi til að halda þar til bæra fundi til að afgreiða lögmæta lista.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×