Brjálað að gera á skriðsundnámskeiðum á Akureyri

Það eru margir í erfiðleikum að ná tækninni í skriðsundi á meðan aðrir fara létt með það og geta synt sundið endalaust. Viktor Emil Sigtryggsson æfði sund í mörg ár á Akureyri en nú hefur hann tekið upp á því að bjóða fólki að skrá sig á skriðsundsnámskeið hjá sér, sjö skipti í einu, til að ná tækninni fyrir fullt og allt.

„Ég var beðin um að halda svona námskeið þegar ég var í pottinum einn daginn. Kona kom til mín og spurði hvort ég væri ekki sundþjálfari og hvort ég væri ekki til í að halda skriðsundsnámskeið fyrir fullorðna og ég sló til og gerði það. Þetta hefur slegið í gegn. Ég auglýsti þetta fyrst og fékk 30 eða 40 fyrirspurnir og síðan hefur þetta bara hrannast upp, ég hef verið að halda námskeið mjög reglulega á Akureyri,“ segir Viktor Emil.

En er skriðsund flókið sund?

„Það er ekkert sérstaklega flókið þegar maður er búin að ná því en það getur reynst svolítið flókið ef maður hefur ekki réttu tæknina,“ segir hann.

Hvað er það sem er svona flóknast við það?

„Flestir segja að anda, já, ætli það sé ekki bara að anda, að ná því að halda hendinni frammi, við erum að slaka á í hverju taki, það getur reynst svolítið flókið,“ segir Viktor Emil.

Mikil ánægja er með námskeiðin hjá Viktori.

„Ég er mjög ánægður, það þýðir ekkert annað, nóg borgar maður, strákurinn er góður kennari,“ segir Þórður Snæbjörnsson þátttakandi á námskeiðinu og skellihlær.

„Hann stendur sig vel í öllu, sem hann tekur sér fyrir hendur, við erum mjög stolt og ánægð með Viktor,“ segir Birna Ingólfsdóttir þátttakandi á námskeiðinu.