Innlent

Efast um hæfi MAST

Bjarki Sigurðsson skrifar
Feldurinn á þessum hest í Borgarfirði er í ansi slæmu ásigkomulagi eftir langa inniveru.
Feldurinn á þessum hest í Borgarfirði er í ansi slæmu ásigkomulagi eftir langa inniveru. Steinunn Árnadóttir

Samtök um dýravelferð á Íslandi (SDÍ) segja viðbrögð Matvælastofnunar (MAST) við vanrækslu hrossa í Borgarfirði ekki vera í samræmi við alvarleika málsins. Samtökin skora á MAST að tryggja viðunandi aðbúnað dýranna á meðan málið er enn í skoðun. 

Í lok sumars var fyrst greint frá því að eigendur 25 hrossa í Borgarfirði væru sakaðir um illa meðferð á skepnum sínum. Steinunn Árnadóttir, íbúi Borgarness, sagði þá í samtali við fréttastofu að hún hafi ítrekað sent erindi til MAST og vissi um fleiri sem hefðu gert slíkt hið sama. 

Þá sagði dýralæknir hrossasjúkdóma hjá MAST í ágúst að málið væri í ferli. Í gær birti MAST síðan yfirlýsingu þar sem sagt var að stofnunin hafi gripið til aðgerða og skipað eigendunum að hleypa hestunum út sem höfðu verið lokaðir inni í litlum hólfum um langt skeið. 

Samtök um dýravelferð á Íslandi gefa lítið fyrir þessa yfirlýsingu MAST og segja að athafnir fylgi ekki orðum þeirra. Samtökin kalla eftir tafarlausum aðgerðum. 

„Enginn vafi er á því að Matvælastofnun (MAST) hefur þær lagaheimildir til að svipta dýr úr umsjá umráðaaðila ef úrbætur þola enga bið. Sú afstaða að dýr njóti lagalegrar verndar er meginandlag dýravelferðarlaga,“ segir í yfirlýsingu samtakanna. 

Samtökin segja MAST vera eina bjargræði dýranna sem lögunum er ætlað að vernda. Því skjóti það skökku við að MAST skuli „halda verndarhendi yfir mannfólki sem tekur að sér að halda dýr og veldur ekki því verkefni,“ eins og það er orðað í yfirlýsingunni. 

Skora á MAST

Líkt og sjá má á myndum sem birst hafa hér á Vísi eru hrossin afar horuð og feldur þeirra í slæmu ásigkomulagi eftir innilokun og vanfóðrun til lengri tíma. Samtökin þakka Steinunni Árnadóttur fyrir myndirnar en hún er sú sem hefur tekið allar þær myndir sem birst hafa í fjölmiðlum. 

„Viðbrögð MAST eru ekki í samræmi við alvarleika málsins og vekja enn frekari efasemdir um hæfi stofnunarinnar til að sinna eftirliti með velferð dýra. SDÍ skorar á MAST að tryggja viðunandi aðbúnað dýranna á meðan „málið er í ferli“,“ segir í yfirlýsingu samtakanna. 

Hér fyrir neðan má lesa yfirlýsingu samtakanna í heild sinni.

Samtök um dýravelferð á Íslandi kalla eftir tafarlausum aðgerðum í máli þessu. Enginn vafi er á því að Matvælastofnun (MAST) hefur þær lagaheimildir til að svipta dýr úr umsjá umráðaaðila ef úrbætur þola enga bið. Sú afstaða að dýr njóti lagalegrar verndar er meginandlag dýravelferðarlaga. 

Stofnunin sem fylgir þeim lögum eftir, MAST, er eina bjargræði dýranna sem lögunum er ætlað að vernda. Það skýtur því skökku við að MAST skuli halda verndarhendi yfir mannfólki sem tekur að sér að halda dýr og veldur ekki því verkefni. Þrátt fyrir yfirlýsingar um góðan vilja MAST fylgja athafnir ekki þeim orðum. 

Ástand dýranna er átakanlegt en hrossin er horuð og feldurinn í slæmu ásigkomulagi eftir innilokun og vanfóðrun til lengri tíma. Þetta sést á myndum frá hugrökkum einstakling sem hefur vakið athygli á málinu og þökk sé áræðni Steinunnar Árnadóttur er ástand hrossana fyrir allra augum. 

Viðbrögð MAST eru ekki í samræmi við alvarleika málsins og vekja enn frekari efasemdir um hæfi stofnunarinnar til að sinna eftirliti með velferð dýra. SDÍ skorar á MAST að tryggja viðunandi aðbúnað dýranna á meðan “málið er í ferli”.

Dýr Dýraheilbrigði Dýraníð í Borgarfirði Borgarbyggð Hestar

Tengdar fréttir

Húðskamma MAST og vilja aðgerðir í Borgarbyggð strax

Eigandi hrossa í Borgarfirði, sem sakaður hefur verið um illa meðferð á skepnum sínum, hefur orðið við kröfum MAST og flutt hrossin á beit, að sögn dýralæknis hrossasjúkdóma hjá stofnuninni. Íbúi í nágrenninnu segir yfirvöld ekki aðhafast nóg - og alltof seint. Lögregla var kölluð til vegna málsins í gærkvöldi. Dýraverndarsambandið kallar eftir aðgerðum strax.

Ákærður fyrir dýraníð fyrir áratug: Kýr með halabrot og -slit

Bóndi sem sakaður hefur verið um illa meðferð hrossa í Borgarfirði var ákærður fyrir dýraníð fyrir tæpum áratug. Matvælastofnun segir ákvarðanir í dýravelferðarmálum geta verið mjög íþyngjandi og því nauðsynlegt að stíga varlega til jarðar í slíkum málum. Stofnunin hefur verið gagnrýnd fyrir viðbrögð sín í málinu.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið