Einar biðst afsökunar á ummælum sínum

Þegar leiktíminn var runninn út skaut Þorsteinn Gauti Hjálmarsson í andlitið á Birgi Má Birgissyni beint úr aukakasti. Í kjölfarið kom til ryskinga milli leikmanna liðanna og áhorfendur í Kaplakrika blönduðu sér líka í hasarinn.

„Gauti bombar í andlitið á honum, ég held hann þoli ekki þennan gaur þannig að ég skil það vel að hann hafi bombað í andlitið á honum,“ sagði Einar í samtali við Vísi eftir leikinn.

„Svo bara „rest is history“. Ef þú horfir á mig þá er ég ekki líklegur til afreka í svona dæmi eins og gerðist í lokin þannig að ég stóð nú bara á þetta og horfði í rólegheitum. Þetta er bara stuð, það er fínt að hafa læti og eitthvað að tala um. Ég hafði gaman af að horfa á þetta.“

Einar hefur nú beðist afsökunar á þessum ummælum sem ku vera komin inn á borð aganefndar HSÍ.

„Vegna ummæla sem ég viðhafði eftir leik FH-Fram. Ég vil koma á framfæri afsökunarbeiðni til allra hlutaðeigandi aðila. Þau ummæli sem ég viðhafði voru sögð í gríni og áttu ekki að særa neinn. Hins vegar geta höfuðmeiðsl verið mjög alvarleg og ekki til þess að tala um af léttúð,“ segir í yfirlýsingunni frá Einari.

Í Seinni bylgjunni á föstudaginn voru ummæli Einars fordæmd. „Ég ætla ekki að kasta einhverjum steinum úr glerhúsi og ég hef sagt ýmislegt heimskulegt í viðtölum en þetta eru einhver ótrúlegustu ummæli sem ég hef heyrt eftir leik í langan tíma. Þetta var hvorki fyndið né spaugilegt,“ sagði Arnar Daði Arnarsson.

Theodór Ingi Pálmason tók í sama streng en bætti við að ummæli Einars hefðu líklega verið sett fram í hálfkæringi. Þau væru þó óheppileg.

Strákarnir hans Einars sækja þrefalda meistara Vals heim í Olís-deildinni klukkan 19:30 í kvöld.