Ofskynjunarsveppir engin töfralausn en mikilvæg viðbót

Óttar Kolbeinsson Proppé skrifar 3. október 2022 11:11

Vilhjálmur segist vita af mörgum á Íslandi sem hafi prófað sveppi og þeir hjálpað þeim mjög. Stöð 2/Arnar

22 þingmenn úr öllum flokkum nema Vinstri grænum hafa lagt fram tillögu á Alþingi um að heimila rannsóknir og tilraunir hér á landi með hugvíkkandi efni sem finnst í sveppum. Flutningsmaður frumvarpsins segir marga nota ofskynjunarsveppi í lækningaskyni og því sé mikilvægt að skapa lagalega umgjörð utan um notkunina.

Sílósíbín heitir efnið sem finna má í um 250 mismunandi sveppategundum. Það veldur hugbreytandi áhrifum á fólki og því hafa þessir sveppir um aldaraðir verið notaðir í ofskynjunarskyni og verið bannaðir hér á landi.

Undanfarin ár hefur þó orðið bylting í rannsóknum á efninu sem virðist geta dregið mjög úr alvarlegum einkennum þunglyndis og annarra geðkvilla ef það er notað á réttan hátt.

Margir tína ofskynjunarsveppi á Íslandi en þeir vaxa víða um höfuðborgarsvæðið, til dæmis á umferðareyjum og túnum.getty/albert fertl

„Ég fann það að hér á landi voru margir farnir að nota þetta og alltaf fleiri og fleiri og fundu að það var að gera mikið gagn og það er búið að setja mikla áherslu á þetta líka úti í heimi hjá erlendum háskólum og heilbrigðisstofnunum,“ segir Vilhjálmur Árnason, þingmaður Sjálfstæðisflokksins, sem er flutningsmaður tillögunnar.

Með henni yrði heilbrigðisráðherra falið að heimila rannsóknir og tilraunir á efninu í geðlækningaskyni og smíða lagalega umgjörð í kring um notkun þess í framhaldinu.

„Og það er líka kannski út af því sem að liggur á, því að maður verður var við að fólk sé farið að nota þetta og þyggja þjónustu frá aðilum sem að eru ekki með þessa faglegu þekkingu sem er nauðsynleg. Af því að mesta hættan við þetta efni er ef að það er ekki veitt á faglegan hátt,“ segir Vilhjálmur.

Þingmenn úr öllum flokkum nema VG koma að tillögunni sem Vilhjálmur er bjartsýnn á að verði samþykkt líkt og gert var með tillögu um hamp og rannsóknir á kannabisefni.

„Þetta er bara stór viðbót við þær geðlækningar sem við höfum í dag. Miðað við þær vísbendingar sem við höfum núna þá mun þetta breyta mjög miklu fyrir stóran hóp en mun ekki vera töfralausnin,“ segir Vilhjálmur.

Sveppir Geðheilbrigði Alþingi Sjálfstæðisflokkurinn Heilbrigðismál Hugvíkkandi efni

Tengdar fréttir

Vona að lyf úr ofskynjunarsveppum komist á markað: „Ein meðferð eins og tíu ára sálfræðimeðferð“

Sérfræðingar segja byltingu framundan í meðferð við þunglyndi, kvíða og fíknisjúkdómum með lyfi sem unnið er úr ofskynjunarsveppum. Þau muni jafnvel leysa af hólmi stóran hluta kvíða- og þunglyndislyfja sem 13% landsmanna nota. Formaður Geðlæknafélags Íslands vonar að lyfin komist á markað en það þurfi fleiri rannsóknir.

1. júní 2021 21:56

Tæpur fjórðungur á þunglyndis-og eða róandi lyfjum, kostnaður tvöfaldast

Tæplega fjórðungur fullorðinna Íslendinga fékk þunglyndis- og eða kvíðalyf á síðasta ári. Það er mun hærra hlutfall en í nágrannalöndum okkar. Konur eru tvöfalt líklegri en karlar til að fá slík lyf og eldri borgarar eru hlutfallslega fjölmennasti aldurshópurinn.

7. júní 2021 19:01

Skyggnast inn í heim hugvíkkandi efna

Rannsakendur við sálfræðideild Háskóla Íslands feta ótroðnar slóðir og kortleggja nú notkun landsmanna á hugvíkkandi efnum. Þúsundir erlendra rannsókna og fræðigreina hafa verið skrifaðar úti í heimi um notkun hugvíkkandi efna í meðferðarskyni en rannsakendurnir segja þetta umfjöllunarefni enn vera á jaðrinum hér á landi.

28. apríl 2022 15:47

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir