Segir skjólstæðing sinn samvinnufúsan og neita allri sök

Hólmfríður Gísladóttir skrifar 26. september 2022 07:06

Ómar segir lögreglu hafa farið fram úr sér við upplýsingagjöf um málið. ÍL/Aldís Pálsdóttir

Ómar Örn Bjarnþórsson, lögmaður annars tveggja manna sem nú sitja í gæsluvarðhaldi grunaðir um að leggja á ráðin um hryðjuverk, segir skjólstæðing sinn neita allri sök.

Maðurinn hafi veitt lögreglu aðgangsorð að öllum tækjum og gögnum sem hald var lagt á og þá kannist hann ekki við að hafa verið í tengslum við erlenda öfgahópa.

Frá þessu er greint í Morgunblaðinu.

Ómar segir manninn þvertaka fyrir að hafa átt aðkomu að skotárás í miðbæ Reykjavík fyrr á árinu en Ómar staðfestir í samtali við Morgunblaðið að fyrri afskipti lögreglu af manninum, þegar hann var 12 ára og að leika sér með leikfangabyssu, hafi verið rædd í yfirheyrslum.

„Þetta var rætt en hann var ekkert spurður hvort hann væri reiður út af þessu,“ segir Ómar.

Ómar segir sér finnast of margt hafa verið gefið upp um málið og segir lögreglu hafa „keyrt svolítið hratt yfir sig“ á blaðamannafundinum sem haldinn var um málið í síðustu viku. Þá gagnrýnir hann fjölmiðil fyrir að hafa nafngreint skjólstæðing sinn.

Ómar segist eiga von á því að lögregla muni fara fram á framlengingu gæsluvarðhalds yfir manninum.

Lögreglumál Grunaðir um skipulagningu hryðjuverka

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.