Innlent

Segir óhugsandi að gera sárin og atvikalýsingar opinberar

Margrét Helga Erlingsdóttir skrifar
Sunna Dóra Möller, ein þeirra sex kvenna sem sökuðu prest um sóknarprest um ósæmilega hegðun, segir að framganga formanns Prestafélags Íslands hafi komið sér í opna skjöldu.
Sunna Dóra Möller, ein þeirra sex kvenna sem sökuðu prest um sóknarprest um ósæmilega hegðun, segir að framganga formanns Prestafélags Íslands hafi komið sér í opna skjöldu. Digraneskirkja

Séra Sunna Dóra Möller, ein sex kvenna sem sökuðu séra Gunnar Sigurjónsson, fyrrverandi sóknarprest við Digranes- og Hjallaprestakall um ósæmilega hegðun, segist eiga erfitt með að sætta sig við framgöngu Arnaldar Bárðarsonar, formanns Prestafélagsins,sem hyggst ekki segja af sér þrátt fyrir umdeilt viðtal hans hjá Útvarpi sögu þar sem hann sagði séra Gunnar vera þolanda í málinu vegna langrar málsmeðferðar.

Arnaldur greindi frá því í samtali við Mbl.is í gærkvöldi að hann hygðist ekki segja af sér þrátt fyrir ákall þess efnis frá Félagi prestvígðra kvenna og að hann myndi boða til félagsfundar. Hann sagðist þá kalla eftir því að skýrsla Þjóðkirkjunnar yrði gerð opinber því hann tryði á opna umræðu og að innan Þjóðkirkjunnar ættu „öll mál að vera uppi á borðinu.“

Sjá nánar: Krefjast afsagnar formanns Prestafélagsins

Séra Sunna segir framgöngu Arnaldar og ákvörðun hans hafa komið sér í opna skjöldu.

„Mér brá svolítið á föstudaginn þegar hann kom fram í fjölmiðlum og nefni orðin lygar og rangfærslur, útskýrir Sunna.

Niðurstaða teymis Þjóðkirkjunnar er að Gunnar hafi í tíu tilfellum gerst uppvís að háttsemi sem stríðir gegn ákvæðum Þjóðkirkjunnar um einelti, kynbundna áreitni, kynferðislega áreitni og ofbeldi.

Sunnu var líka brugðið við að lesa um kröfu hans um að málsgögn yrðu gerð opinber. Tilhugsunin sé óbærileg og komi það ekki til greina af hálfu Sunnu að gera skýrsluna opinbera.

„Vegna þess að í þessari skýrslu eru ekki bara orð á blaði heldur opin sár. Og í mínum huga er búið að ræða þetta. Við erum búnar að ganga í gegnum þetta og að því leyti til finnst mér þetta ekki lengur til umræðu. Varðandi það hvort hann ætli að sitja áfram þá verður hann bara að eiga það við sína samvisku. Heiðarlega sagt, þá finnst mér ég ekki alveg eiga samleið með því [Prestafélagi Íslands] á meðan formaðurinn gengur svona fram.“

Sunna segir að málið hafi fengið faglega og efnislega umræðu.

„Ég er ekki tilbúin til að fara með sárin mín og atvikalýsingar út í almenna umræðu og inn á almennan félagsfund. Að það sé verið að setja þau á uppboð. Það kemur bara ekki til greina og í mínum huga værum við að ganga inn í mjög skaðlegar aðstæður. Það er hlutverk okkar þolendanna í þessu máli að hlúa að okkur sjálfum og treysta þessari niðurstöðu sem er afgerandi og skýr og á bara ekkert að vera neitt frekar til umræðu,“ segir Sunna.

Hún viðurkennir að kvíða fundinum.

„Við finnum allar fyrir kvíða gagnvart því að ganga inn í þessar aðstæður. Það er verið að ræða þetta og þetta er umdeilt innan ákveðinna hópa. Auðvitað langar mann bara að flýja í skjól og hvíla í því að það sé komin niðurstaða en ég vona það að okkur lánist að ræða þetta á heiðarlegan og efnislegan hátt, án þess að fara inn í sárin og inn í allt þetta sem hefur gengið á. Ég allavega treysti mér ekki til þess að leggja mig þannig á borðið.“

Það sé sársaukafullt fyrir þolendur í málinu að öllu sé snúið á hvolf með því að kalla séra Gunnar þolanda og þess vegna hafi félag prestvígðra kvenna farið fram á afsögn.

„Þarna finnst mér hann ekki fara vel með orðið þolandi og í því samhengi hefur hann misst traust og þess vegna sendi Félag prestvígðra kvenna frá sér þessa ályktun, sem er sterk og mikilvæg og sýnir að konur í prestastétt líða ekki lengur gerendameðvirkni og þolendaskömm.“


Tengdar fréttir

Krefjast afsagnar formanns Prestafélagsins vegna viðtals við Útvarp sögu

Félag prestvígðra kvenna krefst þess að Arnaldur Bárðarson formaður Prestafélags Íslands segi af sér vegna ummæla hans í viðtali við Útvarp sögu á dögunum. Þetta kemur fram í yfirlýsingu félags Prestvígðra kvenna sem gefin er út eftir fund félagsins í Langholtskirkju í gær.

Uppvís að kynferðislegri áreitni í tvígang

Teymi Þjóðkirkjunnar hefur metið sem svo að tíu sinnum hafi sóknarprestur kirkjunnar orðið uppvís að háttsemi sem stríði gegn ákvæðum EKKO-reglugerðar kirkjunnar (reglugerð um einelti, kynbundna og kynferðislega áreitni, sem og annað ofbeldi). Presturinn hefur látið af störfum og áformað er að veita honum áminningu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.