Fundu líkamsleifar í tösku sem þau keyptu á uppboði

Bjarki Sigurðsson skrifar 16. ágúst 2022 11:59

Líkamsleifunum hafði verið komið fyrir ofan í ferðatösku. Getty

Fjölskylda sem keypti allt innihald yfirgefins geymslurýmis í Nýja-Sjálandi fann líkamsleifar í tösku sem geymd var þar inni. Lögreglan reynir nú að bera kennsl á líkið.

Það er þekkt í bæði Bandaríkjunum og Mexíkó að þegar fólk greiðir ekki leigu á geymslurými sínu er allt innihald rýmisins sett saman á uppboð. Úr þessari hefð hafa orðið til hinir geysivinsælu þættir Storage Wars sem sýndir eru á sjónvarpsstöðinni A&E.

Með gerð þáttanna hefur þessi iðja orðið sívinsælli um allan heim og ferðast fólk langar leiðir til að taka þátt í þessum uppboðum. Í rýmunum eiga faldar gersemar til að leynast og fólk gæti því grætt heilmikinn pening á þessu.

Nýsjálensk fjölskylda sem býr í Suður-Auckland ákvað að taka þátt í slíku uppboði og keypti allt innihald eins rýmis. Inni í rýminu var fjöldi ferðataska sem þau tóku með sér heim.

Þegar þau opnuðu eina tösku voru líkamsleifar inni í henni. Þau hringdu strax á lögregluna sem vinnur nú í því að bera kennsl á líkið og finna út hver leigði geymsluna. Fjölskyldan sem keypti töskuna er ekki grunuð í málinu.

Nágrannarnir fundu lyktina

Nágrannar fjölskyldunnar sem ræddu við BBC sögðust hafa fundið hræðilega lykt heima hjá sér áður en lögreglan mætti. Einn nágrannanna sem er fyrrverandi starfsmaður líkbrennslu sagðist þekkja þessa lykt hvar sem er.

„Ég vissi þetta strax og ég hugsaði, hvaðan kemur þessi lykt?“ sagði nágranninn í samtali við BBC.

Nýja-Sjáland

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.