Erlent

Mega ekki setja takmörk á vopnaburð á almannafæri

Kjartan Kjartansson skrifar
Tímamótadómur Hæstaréttar Bandaríkjanna um að fólk megi ganga um vopnað utan heimilisins fellur á sama tíma og kallað er eftir hertri skotvopnalöggjöf í kjölfar hrinu fjöldamorða í landinu.
Tímamótadómur Hæstaréttar Bandaríkjanna um að fólk megi ganga um vopnað utan heimilisins fellur á sama tíma og kallað er eftir hertri skotvopnalöggjöf í kjölfar hrinu fjöldamorða í landinu. AP/Jose Luis Magana

Hæstiréttur Bandaríkjanna ógilti lög sem settu takmarkanir við skotvopnaburði í New York sem þýðir að mun fleiri geta gengið um vopnaðir í stærstu borgum landsins í dag. Dómurinn kemur á sama tíma og Bandaríkjaþing er nálægt því að samþykkja nýjar takmarkanir á skotvopn í fyrsta skipti í áratugi.

Sex íhaldssamir dómarar réttarins töldu að lög í New York sem gera kröfu um að byssueigendur sýni fram á sérstaka þörf fyrir að þeir beri vopn sín á almannafæri stæðust ekki stjórnarskrá. Clarence Thomas, höfundur meirihlutaálitsins, sagði stjórnarskrána tryggja rétt einstaklinga til þess að bera skammbyssu til sjálfsvarnar utan veggja heimilisins.

Sambærileg lög hafa verið í gildi í Kaliforníu, Havaí, Maryland, Masschusetts, New Jersey og Rhode Island sem líklegt er að verði ógilt í kjölfarið. Um fjórðungur bandarísku þjóðarinnar býr í ríkjum með slík lög, að sögn AP-fréttastofunnar.

Útlit er nú fyrir að takmarkanir á hver getur gengið um vopnaðir á almannafæri verið að miklu leyti afnumdar þar, þar á meðal í milljónaborgunum New York, Los Angeles og Boston.

Ríkisstjórn Joes Biden hafði hvatt dómarana til þess að staðfesta lögin. Stuðningsmenn þeirra héldu því fram að yrðu þau ógilt leiddi það til aukins vopnaburðar á götum úti og vaxandi tíðni ofbeldisglæpa.

Letitia James, dómsmálaráðherra New York-ríkis, fer nú yfir dóm hæstaréttar. Í tísti hét hún því að gera allt sem í hennar valdi stæði til þess að vernda New York-búa fyrir byssuofbeldi og verja „skynsöm“ skotvopnalög ríkisins.

Fyrsta stóra byssumálið í áratug

Byssuofbeldi hefur verið ofarlega á baugi í Bandaríkjunum undanfarnar vikur eftir hrinu mannskæðra skotárása. Nítján börn og tveir kennarar voru skotnir til bana í skotárás í grunnskóla í bænum Uvalde í Texas í síðasta mánuði og tíu viðskiptavinir verslunar í Buffalo nokkrum dögum fyrr.

Bandaríkjaþing eru nú sagt nær því að ná samkomulagi um ný lög til að reyna að koma í veg fyrir skotárásir af þessu tagi í fyrsta skipti í þrjátíu ár.

Dómur hæstaréttar nú er sá þýðingarmesti í skotvopnamálum frá árinu 2010 þegar dómarar skáru úr um að allir Bandaríkjamenn hefðu rétt á að hafa skotvopn á heimili sínu til sjálfsvarnar. Málið nú snerist um hvort sá réttur næði út fyrir veggi heimilisins.

Áður hefur rétturinn þó komist að þeirri niðurstöðu að það samræmist stjórnarskrá að takmarka vopnaburð á viðkvæmum stöðum, þar á meðal í stjórnarbyggingum og skólum. Þá sé í lagi að takmarka vopnaeign fanga og geðsjúkra.


Tengdar fréttir

Hefðu átt að stoppa byssumanninn eftir þrjár mínútur

Yfirmaður almannavarna í Texas segir að lögreglumenn sem brugðust við skotárásinni í Robb-grunnskólanum í Uvalde í síðasta mánuði hefðu átt að geta stöðvað byssumanninn þremur mínútum eftir að hann réðst inn í skólann. Viðbrögð lögreglu hafi verið „ömurlegt klúður“.

Komust að samkomulagi um herta byssulöggjöf

Hópur öldungadeildarþingmanna úr báðum flokkum Bandaríkjaþings hafa komist að samkomulagi um drög að nýju frumvarpi varðandi byssueign. Enn á eftir að skrifa frumvarpið en líklegt þykir að stuðningur sé við samkomulagið í öldungadeildinni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×