Golf

Dustin John­son ó­vænt meðal kylfinga í ofur­deild sem fjár­mögnuð er af Sádi-Arabíu

Runólfur Trausti Þórhallsson skrifar
Dustin Johnson á PGA-meistaramótinu í maí.
Dustin Johnson á PGA-meistaramótinu í maí. EPA-EFE/TANNEN MAURY

Dustin Johnson, sem var um tíma talinn besti kylfingur í heimi, er óvænt meðal kylfinga í LIV-mótaröðinni sem er fjármögnuð með peningum frá Sádi-Arabíu. Hans helsti styrktaraðili hefur slitið samstarfi þeirra á milli vegna ákvörðunar Johnson.

Þetta kemur virkilega á óvart þar sem Dustin Johnson sagðist í febrúar síðastliðnum að hann yrði hluti af PGA-mótaröðinni. Johnson sagðist þakklátur fyrir að vera meðal keppenda á bestu mótaröð í heimi. 

Johnson er stærsta nafnið sem tekur þátt í LIV-mótaröðinni en goðsögnin Phil Mickelson átti sinn þátt í að koma henni á laggirnar. Það kom sérstaklega á óvart þar sem Mickelson blótaði yfirvöldum þar í landi í sand og ösku í samtali sínu við rithöfundinn Alan Shipnuck.

„Þetta eru ógnvænlegir skrattakollar til að vera í slagtogi við. Við vitum að þeir myrtu Khashoggi og standa sig skelfilega þegar kemur að mannréttindum. Fólk þarna er myrt fyrir að vera samkynhneigt,“ sagði Mickelson. Hann bætti svo við að þetta væri einstakt tækifæri til að breyta því hvernig PGA-mótaröðin virkar.

Johnson virðist ekki hafa látið þetta á sig fá og hefur ákveðið að skrá sig til leiks. Fyrsta mótið fer fram í Hertfordshire á Englandi á sama tíma og Opna kanadíska meistaramótið fer fram en það er hluti af PGA-mótaröðinni.

Ásamt Johnson eru Lee Westwood, Ian Poultier og Sergio Garcia meðal kylfinga á fyrsta móti LIV-mótaraðarinnar þar sem verðlaunaféð er alls 20 milljónir punda. Þar af fær sigurvegarinn þrjár milljónir punda í eigin vasa.

Það gæti verið að PGA-mótaröðin bregði á það að refsa kylfingum fyrir að taka ekki þátt á mótum eftir að hafa skráð sig til leiks. Óvíst er hver sú refsing verður.

Það er hins vegar ljóst að Johnson hefur þegar tapað peningum á ákvörðun sinni en einn helsti styrktaraðili hans, Royal Bank of Canada, hefur slitið samningi sínum við kylfinginn. Samstarf þeirra hófst árið 2018 en þar sem RBC er stoltur styrktaraðili PGA þá getur bankinn ekki staðið með kylfingi sem velur önnur mót fram yfir PGA-mótaröðina.

Það verður forvitnilegt að fylgjast með framvindu mála en mögulega gætu fleiri kylfingar fært sig milli mótaraða ef LIV-mótaröðin borgar jafn vel og af er látið.




Fleiri fréttir

Sjá meira


×