Menning

„Frábært samtal sem ég mæli með fyrir öll sem vilja skilja, breyta og bæta“

Dóra Júlía Agnarsdóttir skrifar
Katrín Oddsdóttir er fundarstjóri á viðburðinum Heilbrigð jörð - Heilbrigt líf.
Katrín Oddsdóttir er fundarstjóri á viðburðinum Heilbrigð jörð - Heilbrigt líf. Saga Sig

Næstkomandi miðvikudag 25. maí fer fram annar viðburður í viðburðaröðinni „Í liði með náttúrunni – náttúrumiðaðar lausnir og áhrif þeirra í víðu samhengi“ í Norræna húsinu ásamt því að vera í beinu streymi. Þessi viðburður ber nafnið Heilbrigð jörð - Heilbrigt líf og fer fram frá klukkan 16:00-18:00. Fundarstjóri er Katrín Oddsdóttir en blaðamaður tók á henni púlsinn og fékk að heyra nánar frá þessu framtaki.

Á viðburðinum Heilbrigð jörð - Heilbrigt líf eru heilbrigði vistkerfa tengd saman við heilsu og vellíðan manna. Ýmis erindi fara fram, meðal annars um tengsl og tengslarof mannfólks við náttúruna og um sálræn áhrif náttúrunnar á andlega heilsu. Einnig verður kafað ofan í undraveröld örveranna með erindi um áhrif örveruflóru á heilsu okkar og Jarðgerðarfélagið verður með loka erindi dagsins.

Viðburðaröðin fer fram í Norræna húsinu.Aðsend

„Það sem mér finnst svo stórkostlegt við þessa viðburðaröð er að þarna er loksins verið að skoða öll þessi umhverfismál út frá því hvernig þetta tengist allt og okkar færustu sérfræðingar um allt samfélagið mæta þarna til leiks og miðla sinni þekkingu á raunverulegu mannamáli.

Ég lærði svo margt af síðasta fundi að ég var stútfull af bæði fróðleik og von eftir hann,“ 

segir Katrín og bætir við að hún sé mjög spennt fyrir næsta miðvikudegi, þar sem fókusinn verður á hvernig náttúran og vernd hennar tengjast okkar eigin heilsu.

„Við fáum svör við spurningum eins og hvaða áhrif hafa örverur í meltingarkerfinu á sálarlíf okkar? Gerir það okkur döpur og kvíðin að vera ekki í betri tengslum við náttúruna?

Þetta er einfaldlega frábært samtal sem ég mæli með fyrir öll sem vilja skilja, breyta og bæta,“

segir Katrín að lokum.

Öll eru velkomin og aðgangur er ókeypis. Nánari upplýsingar um viðburðinn má finna hér.






Fleiri fréttir

Sjá meira


×