Lífið

Oddvitaáskorunin: Kaupir ekki plöntur heldur ræktar þær frá fræi

Samúel Karl Ólason skrifar
Logi Einars, Bergljót og Hákon.
Logi Einars, Bergljót og Hákon.

Vísir stendur fyrir Oddvitaáskoruninni 2022 þar sem skorað er á oddvita allra flokka í sveitarfélögum um land allt að taka þátt. Áskorunin felur í sér stutta kynningu og að svara nokkrum léttum spurningum.

Bergljót Kristinsdóttir leiðir lista Samfylkingarinnar í Kópavogi í komandi sveitarstjórnarkosningum.

Ég heiti Bergljót Kristinsdóttir og skipa 1 sæti á lista Samfylkingarinnar í Kópavogi í komandi kosningum. Ég flutti mánaðargömul í Kópavoginn og hef verið hér að mestu síðan. Ég gekk í Kópavogsskóla og Víghól og svo aftur í Kópavogsskóla þar sem Menntaskólinn í Kópavogi var staðsettur til ársins 1983. Þaðan lá leiðin í Háskóla Íslands þaðan sem ég útskrifaðist sem Landfræðingur. Síðar tók ég viðbótarnám í fjármálum og rekstri fyrirtækja við sama skóla.

Í dag er ég stoltur nemandi Garðyrkjuskólans að Reykjum í Hveragerði og er að fara að kynna lokaverkefnið mitt að loknum kosningum. Þangað fór ég til að læra að rækta skógarplöntur frá fræi og nú er allt fullt af bakkaplöntum í garðinum mínum sem bíða þess að kosningar klárist. 

Ég hef lengst af unnið í tæknigeiranum, var yfirmaður upplýsingatækni hjá fyrirtækjasamsteypunni Veritas Capital í 9 ár og hef sérhæft mig í bókhaldsforritum. Í dag rek ég lítið tæknifyrirtæki. Ég er gift Andrési I. Guðmundssyni jarðfræðingi og við eigum tvö uppkomin börn, Benedikt Reyni og Andreu Björk. Í frítímanum þegar ég er ekki að stússa í plöntum eða úti með hundinn iðka ég golf og hef gert í 35 ár.

Ég er að klára mitt fyrsta kjörtímabil sem bæjarfulltrúi ásamt því að sitja í skipulagsráði og svæðisskipulagsnefnd. Ég brenn fyrir betri byggð, húsnæði fyrir fólk í öllum tekjuhópum og betra samtali við bæjarbúa. Það þarf að þjálfa þetta samtal það kemur ekki að sjálfu sér og við þurfum að finna betri leið til að ná til íbúa.

Hver er fallegasti staðurinn á Íslandi?

Á eftir uppsveitum Kópavogs kemur Barðsnes við ysta haf.

Er eitthvað lítilvægt sem fer þó í taugarnar á þér í þínu sveitarfélagi sem þú vilt að sé lagað?

Að erindum er svarað seint og illa.

Hvert er þitt uppáhalds áhugamál sem gæti þótt skrítið?

Að þurfa nauðsynlega að rækta skógarplöntur frá fræi þegar hægt er að kaupa þær. Og fara í Garðyrkjuskólann til að læra það.

Rannveig, Ásgeir, Helga Vala og Bergljót.

Hver eru þín minnistæðustu samskipti við lögregluna?

Á síðasta ári þegar bíllinn minn hvarf frá fyrirtækinu mínu sem hafði verið brotist inn í tvisvar helgina á undan. Jóhann rannsóknarlögga fann bæði megnið af góssinu sem stolið var og bílinn á innan við sólarhring. Þjófurinn hafði fundið lykil af bílnum sem við týndum hálfu ári áður á sömu slóðum. Jóhann er á „speed dial“ hjá mér í dag.

Hvað færðu þér á pizzu?

Ég fæ mér næstum aldrei pizzu en ef það gerist verður að vera pepperoní, jalapeno, svartar ólífur og rjómaostur á henni.

Hvaða lag peppar þig mest?

Bat out of hell með Meat Loaf klikkar ekki eftir öll þessi ár.

Hvað getur þú tekið margar armbeygjur?

Hmm.. ég get staðið á haus.

Göngutúr eða skokk?

Göngutúr með hundinn eða golfbolta.

Uppáhalds brandari?

Ég heyrði þennan í vikunni – Hvað sagði annar pallurinn við hinn pallinn? - „af hverju erum við ekki svalir“ hann er bestur í dag því hann er sá eini sem ég man.

Hvað er þitt draumafríi?

Golfferð með góðum vinum hvar sem er.

Hvort fannst þér 2020 eða 2021 vera verra ár?

Þetta kex var vont báðu megin.

Uppáhalds tónlistarmaður?

Leonard Cohen. Sá hann áttræðan á tónleikum. Hann var eins og unglamb.

Hvað er það skrýtnasta sem þú manst eftir að hafa gert?

Að ganga á glóandi kolum 10 m leið og geta það án þess að brenna.

Ef það væri gerð kvikmynd um ævi þína, hver ætti að leika þig? Má vera íslenskur eða útlenskur.

Jamie Lee Curtis.

Hefur þú verið í verbúð?

Nei en næstum því. Bjó sumarið 1976 á Suðureyri og vann m.a. í fiski og kom oft í verbúðina.

Áhrifamesta kvikmyndin?

Sú sem ég hef séð oftast er „The fifth element“. Langar alltaf að sjá hana aftur.

Áttu eftir að sakna Nágranna?

Nei, hef lítið kynnst þeim.

Ef þú yrðir að flytja úr þínu sveitarfélagi, hvert myndir þú helst vilja fara?

Á Kirkjubæjarklaustur ef þeir finndu heitt vatn. Annars Hveragerði.

Uppáhalds „guilty pleasure“ lag? (skammast þín smá fyrir að hafa gaman af því – sakbitin sæla)

Til eru fræ með Hauki Morthens.






Fleiri fréttir

Sjá meira


×