Innlent

Áfrýjar sýknudómi zúistabræðra til Landsréttar

Kjartan Kjartansson skrifar
Finnur Þór Vilhjálmsson, saksóknari sem rak málið gegn Zuism-bræðrum, í Héraðsdómi Reykjavíkur.
Finnur Þór Vilhjálmsson, saksóknari sem rak málið gegn Zuism-bræðrum, í Héraðsdómi Reykjavíkur. Vísir/Vilhelm

Ríkissaksóknari hefur áfrýjað sýknudómi yfir tveimur bræðrum sem reka trúfélagið Zuism til Landsréttar. Héraðsdómur Reykjavíkur sýknaði bræðurna af ákæru um fjársvik og peningaþvætti í síðasta mánuði.

Finnur Þór Vilhjálmsson, saksóknari hjá embætti héraðssaksóknara, staðfestir við Vísi að dómnum hafi verið áfrýjað en vill ekki tjá sig efnislega um niðurstöðu héraðsdóms. Dómurinn hefur enn ekki verið birtur á vef dómstólsins þrátt fyrir að rétt tæpur mánuður sé síðan hann var kveðinn upp.

Bræðurnir Ágúst Arnar og Einar Ágústssynir voru ákærðir fyrir að svíkja hátt í 85 milljónir króna út úr ríkinu í formi sóknargjalda með því að látast reka trúfélag sem uppfyllti skilyrði laga um slík félög. Þeir voru einnig ákærðir fyrir peningaþvætti á fjármununum.

Auk bræðranna var trúfélagið Zuism sjálft, einkahlutafélagið EAF sem Einar er í forsvari fyrir og bandaríska skúffufélagið Threescore LLC í Delaware ákært í málinu. Bræðurnir millifærðu meðal annars stóran hluta fjármuna Zuism á félagið EAF sem þeir létu Zuism síðar kaupa af öðru félagi Einars.

Sýknudómurinn þýddi að bræðurnir og félög þeirra þurftu ekki að sæta upptöku á tugmilljón króna eignum.

Ágúst Arnar Ágústsson við aðalmeðferð málsins í Héraðsdómi Reykjavíkur í febrúar.Vísir/Vilhelm

Fyrir dómi hélt saksóknari því fram að svo virtist sem að Ágúst Arnar hafi fjármagnað persónulega neyslu sína með sóknargjöldum sem Zuism fékk frá ríkinu. Í ákæru kom fram að bræðurnir hefðu meðal eytt milljónum af sóknargjöldunum á veitingahúsum, í áfengi og ferðalög.

Ágúst Arnar svaraði litlu um ráðstöfun fjármunanna við aðalmeðferð málsins. Einar bróðir hans hélt því hins vegar fram að hann væri trúaður á kennisetningar fornsúmera og að hann sæi fyrir sér að reka trúfélagið áfram í framtíðinni, fengi það það að starfa óáreitt.

Sýslumaðurinn á Norðurlandi eystra, sem hefur eftirlit með starfsemi trú- og lífsskoðunarfélaga, hefur haldið eftir sóknargjöldum Zuism frá því í byrjun árs 2019. Vísar embætti til verulegs vafa um hvort að raunveruleg starfsemi fari fram á vegum félagsins og hvort það uppfylli skilyrði laga.

Uppfært 11:30 Í upphaflegri útgáfu fréttarinnar stóð að héraðssaksóknari hefði áfrýjað dómnum til Landsréttar. Það rétt er að ríkissaksóknari tekur ákvörðun um áfrýjun.


Tengdar fréttir

Óljóst hvað verður um sóknargjöld Zuism

Ekki liggur fyrir hvort að sýkna stjórnenda trúfélagsins Zuism af ákæru um fjársvik og peningaþvætti hafi áhrif á greiðslur sóknargjalda til félagsins sem hafa verið fryst í meira en þrjú ár. Enn eru hátt í þúsund félagsmenn í Zuism.

Segist trúaður en að Zuism hafi skuldað þeim fé

Einar Ágústsson sagði að uppsöfnuð skuld trúfélagsins Zuism við hann og bróður hans skýrði einhverjar þeirra millifærslna af reikningum félagsins til þeirra og félaga þeirra í Héraðsdómi Reykjavíkur í dag. Þeir Ágúst Arnar Ágústsson eru ákærðir fyrir fjársvik og peningaþvætti í tengslum við Zuism.

Gat litlu svarað um fjármál Zuism og ráðstöfun fjármuna

Fátt var um svör og skýringar þegar Ágúst Arnar Ágústsson, forstöðumaður Zuism, var spurður út í fjármál félagsins í Héraðsdómi Reykjavíkur í morgun. Ágúst og bróðir hans Einar eru ákærðir fyrir fjársvik og peningaþvætti.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×