Ölgerðin hélt lang­þráða árs­há­­tíð í tékk­neskum kastala

Árshátíð Ölgerðarinnar fór fram í spænska salnum svokallaða, hátíðarsal sem hefur meðal annars verið notaður fyrir móttökur Tékklandsforseta. Salurinn var byggður á árunum 1602 til 1606 og er með tólf metra lofthæð en kastalann má finna á heimsminjaskrá UNESCO. Eva Ruza og Hjálmar Örn sáu þar um veislustjórnun og Siggi Gunnars þeytti skífum.

Þetta var í fyrsta sinn í þrjú ár sem Ölgerðin hélt árshátíð og segir Jóhanna Laufdal Friðriksdóttir, mannauðsstjóri fyrirtækisins, að heimsfaraldurinn hafi auðvitað sett þar strik í reikninginn líkt og hjá öðrum stórum fyrirtækjum. Ölgerðin hafi þess í stað lagt fé til hliðar í árshátíðarsjóð og svo nýtt tækifærið til þess að fara utan.

„Með þessu þakkaði Ölgerðin starfsfólkinu sínu fyrir frábæra vinnu við þær afar krefjandi aðstæður sem ríkt hafa undanfarin misseri og hafa meðal annars kostað það að starfsfólkið hefur ekki getað haldið árshátíðir eða komið saman,“ segir Jóhanna. Óhætt sé að segja að starfsfólkið hafi skemmt sér konunglega um helgina.

Íslendingar orðnir ferðasjúkir

Þór Bæring Ólafsson, annar eigenda ferðaskrifstofunnar Komdu með, segir að það hafi færst mjög í aukana eftir afléttingar sóttvarnatakmarkanna að fyrirtæki reyni að gera vel við starfsfólk sitt og leggi land undir fót.

„Það er búið að vera hálfgerð sprenging í þeim efnum. Það eru ansi mörg fyrirtæki sem eru akkúrat í þessari stöðu núna að vilja fara út með fólkið enda ekki búið að fara neitt í tvö til þrjú ár og margir ekki einu sinni búnir að halda árshátíð svo eðlilega er reynt að gera þetta svolítið flott núna.“

Þór segir að Komdu með hafi skipulagt um tíu slíkar árshátíðir fyrir íslensk fyrirtæki upp á síðkastið og fjölmargar ferðir séu á dagskránni í haust. 

„Þetta er að vakna aftur til lífsins, það er alveg á hreinu.“

Misjafnt sé hvert fyrirtæki séu að fara en stærri fyrirtæki á borð við Ölgerðina taki oftast leiguvélar undir starfsfólk sitt. Auk þess að skipuleggja ferðir til Prag hefur fyrirtæki Þórs farið með starfsmannahópa á árshátíðir í Alicante, London, Berlín, París og Kaupmannahöfn og Split í Króatíu. Þá hefur fréttastofa upplýsingar um að fyrirtæki hafi sömuleiðis gert sér ferðir til Amsterdam og Brighton á Englandi.

Þór segir að í flestum tilvikum séu þetta helgarferðir þar sem fólk gisti í tvær eða þrjár nætur erlendis. Utanlandsferðirnar einskorðist ekki við ákveðin svið íslensks atvinnulífs heldur sé um að ræða fjölbreyttan hóp fyrirtækja.

„Mér finnst vera mikill vilji hjá starfsmannafélögum, sem eru oft búin að safna upp peningum, til að gera eitthvað fyrir starfsfólkið. Það er mikill ferðavilji hjá fólki. Íslendingar eru bara ferðasjúkir núna.“